Fotojamlanma: so‘nggi 100 yilda xonliklarni boshqargan hukmdorlar 

XIX asr boshlarida o‘zbek qo‘ng‘irotlar sulolasi Xiva xonligida hokimiyatni rasman egallagan. Muhammad Rahimxon I Xiva xonligini birlashtirishni nihoyasiga yetkazgan hukmdor. Xiva xonlaridan ayrimlarining surati bugungi kungacha saqlanib qolgan.

Muhammad Rahimxon II, Xiva xonligining so‘nggi mustaqil hukmdori. 1864-1910 yillarda hukmdorlik qilgan. U Feruz taxallusi bilan ijod qilgan.

Xiva xoni Muhammad Rahim II (Feruz) o‘z mahramlari va rossiyalik mehmonlar bilan.

Asfandiyorxon, Muhammad Rahimxon II ning o‘g‘li, 1910-1918 yillarda hokimiyat tepasida bo‘lgan.

Tarixiy hujjatlarda Asfandiyorxon Isfandiyorxon deb ham yoritiladi.

Said Abdullaxon, Asfandiyorxonning ukasi. 1918-1920 yillarda Xivani boshqargan so‘nggi xon.

Qo‘qon xonligiga o‘zbeklarning minglar urug‘idan bo‘lgan Shohruxbiy 1709 yilda asos solgan. Bu davlat tarkibiga dastlab Qo‘qon, Namangan, Marg‘ilon, Konibodom, Isfara va ularning atrofidagi qishloqlar kirgan.

Amir Umarxon, Qo‘qonning 10-xoni. U “Amiriy” taxallusi bilan she’rlar yozgan. 1809-1822 yillarda Qo‘qonni boshqargan.

Xudoyorxon, Qo‘qonning 13-xoni Sheralixonning o‘g‘li. 1845-1875 yillarda tanaffus bilan Qo‘qonda hukmdorlik qilgan.

Nasriddinxon, 1875-1876 yillarda hokimiyatga chiqqan, Qo‘qonning so‘nggi xoni.

1756 yildan o‘zbek sulolasi ashtarxoniylar o‘rniga kelgan o‘zbek mang‘itlar sulolasi vakillari o‘zlarini amir deb atashgan. Shunga ko‘ra, davlat Buxoro amirligi deb atala boshlangan.

Amir Nasrullo, Buxoro amirligini boshqargan mang‘itlar – o‘zbek sulolasining 7-hukmdori va shu sulolaning 5-amiri. 1827-1860 yillarda hukmdorlik qilgan.

Amir Muzaffar, Amir Nasrulloning o‘g‘li. 1860-1885 yillarda Buxoro amirligi tepasida bo‘lgan.

Amir Abdulahad, Amir Muzaffarning o‘g‘li. 1885-1910 yillarda Buxoroda hukmdorlik qilgan.

Amir Said Olimxon, Amir Abdulahadning o‘g‘li. 1910-1920 yillarda Buxoroni boshqargan. Buxoroning so‘nggi amiri.