Ukrainaning Chornomorsk portidan don ortilgan yana ikki kema yo‘lga chiqdi

Don ortilgan yana ikkita kema Ukrainaning Chornomorsk portidan jo‘nab ketdi. Ukraina va RFning Turkiya bilan kelishib olgan «don yo‘lagi» doirasida Barbados bayrog‘i ostidagi Fulmar S va Marshall orollari bayrog‘i ostidagi Thoe yuk kemalari jo‘nab ketdi, deb xabar qildi Turkiya Mudofaa vazirligi 13 avgust, shanba kuni Twitter’da. 12 ming tonna makkajo‘xori bo‘lgan birinchi kema Iskenderunga, ikkinchisi - 3 ming tonna kungaboqar urug‘i bo‘lgan kema Tekirdog‘ga yo‘l oldi, deyiladi ma’lumotda.

Shu bilan birga, Turkiya mahkamasi kun davomida Ukrainaga yangi don partiyasini sotib olish uchun kema jo‘nashi kutilayotganini ma’lum qildi. 

Kecha Chernomorsk va Yujniydan Ukraina oziq-ovqat mahsulotlari bo‘lgan yana ikkita kema chiqib ketib, Turkiya va Eronga yo‘l oldi. Umuman olganda, avgust oyi boshidan beri Ukraina Qora dengiz portlarini 16 ta kema tark etdi, ular urushdan vayron bo‘lgan mamlakatdan 450 ming tonnaga yaqin oziq-ovqat olib chiqdi. 1 avgust kuni qishloq xo‘jaligi mahsulotlarini olib chiqqan birinchi kema Odessadan jo‘nab ketdi. Serra-Leone bayrog‘i ostidagi, jo‘xori ortilgan Razoni quruq yuk kemasi Livanga yo‘l oldi va ertasi kuni Istanbulda tekshiruvdan o‘tdi. 

Iyul oyi oxirida Istanbulda Rossiya va Ukraina BMT rahbari Antoniu Guterrish vositachiligida urush boshlanganidan beri dengiz portlarida to‘sib qo‘yilgan millionlab tonna Ukraina g‘allasini eksport qilish muammosini hal qilish bo‘yicha kelishuvlarni imzoladi. Rossiya va Ukraina o‘rtasidagi kelishuv birgalikda tuzilmagan, aksincha, tomonlarning har biri Turkiya va BMT bilan alohida hujjat imzolagan. Shartnoma imzolanganidan bir kun o‘tmasdan Rossiya Odessa dengiz portiga raketa hujumini amalga oshirdi.