Tixanovskaya: Protasevichga hukm - belaruslar uchun sinov

Minskda Nexta Telegram-kanalining sobiq bosh muharriri Roman Protasevichga nisbatan chiqarilgan hukm barcha belaruslar uchun sinovdir, dedi Belarus muxolifati yetakchisi Svetlana Tixanovskaya. "Bugun men har bir belaruslikdan so‘rayman: o‘zingizga qarang, o‘z qadriyatlaringizga sodiq qoldingizmi? Chunki ularsiz biz qasoskor, g‘ayriinsoniy rejimga o‘xshab qolish xavfimiz bor. Men sizdan inson bo‘lib qolishingizni so‘rayman", - deb yozdi u 3 may, chorshanba kuni Telegram sahifasida.

Tixanovskaya siyosiy sabablarga ko‘ra hukm chiqarish, qiynoqlar va odam savdosiga qarshi bo‘lgan demokratik harakat qadriyatlarini eslatdi. "Biz demokratiya va qonun oldida hamma teng ekanligi tarafdorimiz. Biz qasos emas, adolat tarafdorimiz. Shuning uchun hozirda Belarusda insoniyatga qarshi jinoyat sodir etgan har bir kishi javobgarlikka tortilishi kerak. Lekin u mustaqil va professional sud bo‘lishi kerak", dedi u Belarusdagi barcha siyosiy mahbuslarni ozod qilishga chaqirib.

Shu kuni Belarus sudi Protasevichni bir qator jinoyatlarni sodir etishda aybdor deb topdi va 8 yilga ozodlikdan mahrum qildi. Avvalroq ayblov bilan chiqish qilgan prokuratura suddan Nexta sobiq bosh muharriri sudgacha bo‘lgan kelishuv shartlarini bajarganligini hisobga olishni so‘radi. Shunga ko‘ra, ayblov uni 10 yilga ozodlikdan mahrum etishni so‘ragan. 

Ayni paytda, Nexta asoschisi Stepan Putilo 20 yilga, Telegram-kanalning sobiq muharriri Yan Rudik esa 19 yilga ozodlikdan mahrum etildi. Ular xorijda, sirtdan sudlangan.