Foto: Bosh vazir va Vazirlar Mahkamasi xodimlari Bo‘stonliqda ko‘chat o‘tqazdi

19 noyabr kuni bosh vazir Abdulla Aripov boshchiligidagi O‘zbekiston Vazirlar Mahkamasi xodimlari Toshkent viloyati Bo‘stonliq tumanida kuzgi ko‘chat ekish mavsumida ishtirok etdi.

Bosh vazir matbuot kotibi Bekzod Hidoyatov xabar berishicha, «Yashil makon» loyihasi doirasida bodom, sadaqayrag‘och, eman, qrim qarag‘ayi singari mevali va manzarali daraxt ko‘chatlari ekilgan.

Prezident tashabbusi bilan 2021 yil noyabr oyidan boshlab har yili 200 million tup daraxt ekish loyihasi amalga oshirilmoqda. 25 oktyabrdan 1 dekabrgacha davom etadigan joriy kuz mavsumida 85 million tup ko‘chat ekish rejalashtirilgan.

Shavkat Mirziyoyev ham 14 noyabr kuni Toshkent shahridagi mahallalardan biriga ko‘chat o‘tqazib, kuzgi daraxt ekish mavsumini boshlab bergandi.