2023 yilda O‘zbekistonda 68 turdagi dori vositasi qalbaki ekani aniqlandi 

2023 yilda 68 turdagi 7029 o‘ram dori vositasi qalbaki ekani aniqlandi. Bu haqda Farmatsevtika mahsulotlari xavfsizligi markazi xabar berdi. 

Qayd qilinishicha, 2023 yilda Farmatsevtika mahsulotlari xavfsizligi markaziga Huquqni muhofaza qilish organlari va tibbiyot tashkilotlari hamda fuqarolar tomonidan dori vositalari va tibbiy buyumlarni ekspertiza qilish yuzasidan 1671 ta murojaat kelib tushgan. 

Ushbu murojaatlar asosida taqdim qilingan farmatsevtika mahsulotlari o‘rnatilgan tartibda laboratoriya tekshiruvidan o‘tkazilgan. Tahlil natijalariga ko‘ra 6304 turdagi 1,3 mln o‘ramdan ortiq dori vositasining tibbiyot amaliyotida qo‘llash mumkin emasligi, 2288 turdagi 542 ming o‘ram dori vositasining muvofiqlik sertifikati yo‘qligi, 241 turdagi 11,7 ming o‘ram dori vositasi yorliqlash ko‘rsatkichi bo‘yicha nomuvofiqligi, 152 turdagi 1278 o‘ram dori vositasining yaroqlilik muddati o‘tgani, 68 turdagi 7029 o‘ram dori vositasining qalbaki ekani to‘g‘risida ekspertiza xulosasi berilgan. 

Qayd qilinishicha, farmatsevtika mahsulotlari texnik jihatdan tartibga solish sohasidagi normativ hujjatlar talablariga muvofiqligi tasdiqlanishi majburiy bo‘lgan mahsulot hisoblangani bois, qonunchilikda o‘rnatilgan tartibda akkreditatsiya qilingan, farmatsevtika mahsulotlarining belgilangan talablarga muvofiqligini tasdiqlashga oid faoliyatni amalga oshiruvchi sertifikatlashtirish organlari tomonidan sertifikatlashtiriladi. 

Amaldagi tartibga muvofiq, davlat ro‘yxatidan o‘tgan va import qilingan dori vositalarining har bir seriyasi sertifikatlashtirish jarayonidan o‘tadi hamda har bir seriya mahsulotga muvofiqlik sertifikati rasmiylashtiriladi. Sertifikatlashtirilmagan dori vositalarining bojxona hududidan olib chiqilishiga va realizatsiya qilinishiga yo‘l qo‘yilmaydi. 

O‘zbekiston hududiga olib kiriladigan dori vositalarining va tibbiy buyumlarni sertifikatlashtirish sinovlari natijasida qo‘llash uchun yaroqsizligi aniqlangan bo‘lsa, bunday dori vositalari va tibbiy buyumlar O‘zbekiston Respublikasi bojxona qonunchiligida belgilangan tartibda O‘zbekiston Respublikasi hududidan tashqariga chiqarib yuboriladi (reeksport) yoki bojxona rejimida joylashtiriladi va yo‘q qilinadi.