YeI Putinning inauguratsiyasida ishtirok etish borasida bir qarorga kelolmayapti

7 may, seshanba kuni Kremlda bo‘lib o‘tadigan Vladimir Putinning Rossiya Federatsiyasi prezidenti lavozimiga kirishish marosimida o‘z vakillarining ishtirok etishi masalasida Yevropa Ittifoqi davlatlari turlicha fikrda. 

Xususan, Fransiya, Vengriya va Slovakiya «aloqa kanallarini ochiq saqlash» maqsadida Rossiya tomonining taklifini qabul qilmoqchi, deb yozadi dpa agentligi Bryusseldagi bir necha diplomatlarga tayanib. Ayni paytda Yevropa Ittifoqining ko‘plab boshqa a’zolari, jumladan Germaniya ham Putinning inauguratsiya marosimida qatnashmaslikka qaror qildi. 

«Germaniya bu tadbirda ishtirok etmaydi», dedi 6 may kuni Germaniya tashqi ishlar vazirligi vakili. Avvalroq Germaniya hukumati GFRning Moskvadagi elchisi Aleksander Lambsdorffni Germaniya Sotsial-demokratik partiyasi pochta serveriga rossiyalik hakerlarning kiberhujumlarga aloqadorligi haqidagi ma’lumotlar bilan bog‘liq holda maslahatlashuvlar o‘tkazish uchun bir haftaga Berlinga chaqirib olganini ma’lum qilgandi. 

6 may oqshomida Vladimir Putinning beshinchi prezidentlik muddatiga inauguratsiyasiga taklifni qabul qilishdan bosh tortgani haqida Yevropa Ittifoqining Bryusseldagi tashqi siyosat xizmati ham xabar qildi. Avvalroq Yevropa Ittifoqi tashqi ishlar va xavfsizlik siyosati bo‘yicha oliy vakili Jozep Borrel YeI vakilining marosimda ishtirok etishiga qarshi chiqqan edi. Biroq, ba’zi diplomatlar bu fikrga qo‘shilmadi, deya ta’kidlaydi dpa. Agentlikka ko‘ra, ularning dalillari shundan iboratki, bunday qadam Rossiyaga kelajakda diplomatik qoidalar va me’yorlarga yanada ko‘proq e’tibor qilmaslik uchun asos beradi. 

Britaniyaning Putin inauguratsiyasida ishtirok etishdan bosh tortishi

Yevropa Ittifoqiga a’zo bo‘lmagan Buyuk Britaniya ham 7 may kuni Kremlga o‘z vakilini yuborish niyatida emasligini ma’lum qildi. 

«Birlashgan Qirollik 2024 yil 7 may kuni bo‘lib o‘tishi kerak bo‘lgan prezident Vladimir Putinning inauguratsiyasiga o‘z vakilini yubormaydi. Rossiyaning Ukrainaga hujumi - suveren davlatga asossiz, qasddan va vahshiylarcha hujumdir», - deya Britaniya Tashqi ishlar vazirligining bayonotidan iqtibos keltiradi Reuters agentligi.

7 may kuni 71 yoshli Vladimir Putin beshinchi marta Rossiya Federatsiyasi prezidenti sifatida qasamyod qilishi kerak. Mart oyida bo‘lib o‘tgan saylovlarda Rossiya Federatsiyasi Markaziy saylov komissiyasi amaldagi davlat rahbarini qo‘llab-quvvatlovchi ovozlarning 87 foizini hisoblab chiqdi. G‘arb Rossiya saylovlarini erkin va adolatsiz deb tanqid qildi.