Dunyoda bir oy ichida qariyb 50 ming kishida vabo aniqlandi

Dunyoda 2024 yilning avgust oyi davomida qariyb 50 ming kishida vabo aniqlandi, ularning 160 nafardan ortig‘i vafot etdi. Bu haqda Jahon sog‘liqni saqlash tashkiloti (JSST) ma’lum qildi.

JSST ma’lumotlariga ko‘ra, avgustda 17 ta davlatdan vabo bilan kasallanishga oid 49,9 mingta va o‘lim bilan bog‘liq 161 ta holat haqida xabar kelib tushgan. Iyul bilan taqqoslaganda ushbu oyda kasallanish ko‘rsatkichi 16 foizga, o‘lim holati esa 28 foizga kamaygan.

Afg‘onistonda avgust oyida 24 ming 977 kishida, Pokistonda — 7 ming 802 kishida, Yamanda esa 7 ming 123 kishida vabo aniqlangan. «Yaqinda Markaziy va G‘arbiy Afrikada, shuningdek, Janubi-Sharqiy Osiyoda yuz bergan suv toshqinlari vaboning yuqish ehtimolini oshirdi», — deyiladi JSST xabarida.

Qayd etilishicha, joriy yilning 1 yanvaridan 25 avgustiga qadar dunyoning 28 ta davlatida 371,5 mingdan ortiq vabo bilan kasallanish hamda 2 ming 527 ta ushbu kasallik oqibatida yuzaga kelgan o‘lim holati aniqlangan.

Kasallik asosan Sharqiy O‘rta yer dengizi va Afrika mintaqasida keng tarqalmoqda. Afg‘onistonda yil boshidan beri 120 mingdan ortiq insonda, Pokistonda — qariyb 50 ming kishida, Yamanda — 31 mingdan ziyod insonda vabo aniqlangan. Undan keyingi o‘rinlarda Kongo Demokratik Respublikasi, Efiopiya, Zambiya va Zimbabve turibdi.

Avvalroq 2023 yili dunyo bo‘yicha vabo infeksiyadan o‘lim ko‘rsatkichi 2022 yilga nisbatan 71 foizga, kasallanish holatlari esa 13 foizga oshgani to‘g‘risida xabar berilgandi.