GFR rasmiylari RF jurnalistlariga mamlakatni tark etishni buyurmagan

Germaniya federal hukumati Rossiyaning Birinchi kanali xodimlariga mamlakatni tark etishni buyurmadi va ularning kasbiy faoliyatini cheklamadi, dedi Germaniya tashqi ishlar vazirligi vakili Kristian Vagner 27 noyabr, chorshanba kuni Berlindagi hukumat matbuot anjumanida. U Berlin shahar hokimiyati darajasida migratsiya nazorati organlarining Birinchi kanal xodimlariga qarshi da’volari bor bo‘lishi mumkinligini taxmin qildi, ammo federal hokimiyat Birinchi kanal xodimlariga qarshi hech qanday ogohlantirish bermaganini ta’kidladi.

Uning so‘zlariga ko‘ra, agar ARD teleradiokompaniyasining ikki xodimi Rossiya Federatsiyasidan chiqarib yuborilgani haqidagi xabarlar tasdiqlansa, Germaniya TIV Rossiya rasmiylarining bu qarorini keskin qoralaydi, chunki bu hech qanday tarzda adekvat javob emas.

Birinchi kanalning Berlindagi muxbiri mamlakatni tark etish talabi haqida ma’lum qildi

Xuddi shu kuni ertalab Germaniyada ishlayotgan Rossiyaning Birinchi kanali jurnalistlari «Germaniya rasmiylarining mamlakatni tark etish talabi» haqida ma’lum qilishdi. Ular tegishli hujjatni 26 noyabr kuni oldilar, deb xabar qildi TASS Rossiya davlat agentligi muxbir Ivan Blagoyning bayonotiga tayanib. Shu bilan birga, agentlikning ta’kidlashicha, gap «Birinchi kanalning Germaniya byurosini yopish» haqida ketyapti. Blagoy bu chorani Birinchi kanalning Kaliningrad oblastida gaz taqsimlash shoxobchasidagi portlash munosabati bilan Germaniya fuqarosining hibsga olingani haqidagi xabariga bog‘ladi. «Mamlakatni tark etish talabi Germaniya fuqarosining Rossiyada hibsga olingani haqidagi xabar efirga uzatilgandan so‘ng deyarli darhol qabul qilindi», dedi u.