Wikileaks: Обама Клинтон электрон почтаси борасида ёлғон гапирган

АҚШ президент Барак Обама собиқ давлат котиби Ҳиллари Клинтон хизмат ёзишмаларини амалга ошириш учун хусусий сервердан фойдаланганини билмагани хусусида ёлғон гувоҳлик берган. Махфий маълумотларни чоп этиб келувчи Wikileaks сайти шундай фикрда.

Ташкилотнинг Твиттердаги эълонига кўра, Клинтон атрофидагиларнинг «янги мактублари» «Обама Клинтоннинг шахсий электрон почта манзилидан фойдаланганини билмаслиги ҳақидаги даъволари ёлғон эканини кўрсатади».

Wikileaks ўз баёнотини исботлаш мақсадида 2015 йил 7 мартида Шерил Миллзнинг Жон Подестага йўллаган мактубини келтиради. Миллз 2009-2013 йилларда Ҳиллари Клинтон давлат котиби бўлган вақтда, Давлат котиби аппарати раҳбари бўлган. 

Ташкилот эълон қилган мактуб бир қатор гапдан иборат: «Биз буни тозалашимиз керак; унда (Барак Обамада) state.gov деб ёзилмаган электрон почта орқали Клинтон юборган мактуб бор».

АҚШ давлат департаменти state.gov домен номини ишлатади. Шунга кўра, Америка ташқи сиёсат маҳкамаси барча ходимларининг электрон почта манзиллари айни шу сўзлар билан якунланади. 

Аввалроқ, АҚШ президентлиги учун республикачилар номзоди Дональд Трамп Америка етакчиси Барак Обамага нисбатан Ҳиллари Клинтон ёзишмалари бўйича тергов бошлашни таклиф қилган эди.