Янги McLaren суперкарининг навбатдаги видеолари намойиш қилинди

McLaren Automotive компанияси интернетда 650S моделининг вориси бўлган янги суперкар тизерларини жойлаштирди. Британ маркаси ниқобланган прототип пойга треки бўйлаб дрифт амалга ошираётгани, синовларни ўтказувчи ҳайдовчи Крис Гудвин машинани бошқариш ва унинг конструкциясининг ўзига хос жиҳатлари ҳақида сўзлаб берувчи роликни намойиш қилди. 

Шунингдек, компания автомобиль 200 км/соат тезликдан тўлиқ тўхташига 4,6 сония ёки 117 метр масофа кетишини маълум қилди. Бу 650S моделидан  6 метр камроқ, бироқ гибрид гиперкари P1’нинг кўрсаткичига жуда яқин. 

Бунгача компанияда купе 0 дан 200 км/соатгача 7,8 сонияда эриша олиши маълум қилинганди. Қиёслаш учун, 650S’да бунга 8,4 сония талаб қилинади.

Суперкар 4 литрли 8 цилиндрли, 720 от кучига эга двигатель билан жиҳозланади. Модел учун янги карбон монококк кузов, модернизацияланган адаптив шасси, бошқарувчи электроника учун махсус дрифт-режим, ўзгача чиқариш тизими ва фаол аэродинамик элементлар тайёрланган.  

Автомобиль март ойида Женевадаги моторшоуда илк маротаба намойиш қилинади.