Оксана Чусовитина Бокудаги жаҳон кубогида шоҳсупага кўтарилди

Озарбойжон пойтахти Боку шаҳрида спорт гимнастикаси бўйича жаҳон кубогининг навбатдаги босқичи ўз якунига етиб бормоқда. Бугун регламентга белгиланганидек, аёллар ўртасида таяниб сакраш бўйича финал босқичи бўлиб ўтди, деб хабар қилмоқда Миллий олимпия қўмитаси.

Энг кучли 8 нафар спортчи орасида баҳс олиб борган вакиламиз Оксана Чусовитина жорий турнирдан ҳам медаль билан қайтадиган бўлди. Спортчимизнинг ижросини ҳакамлар ҳайъати 14,450 балл билан баҳолашди.

Финалчилар орасида фақатгина америкалик Жейд Кэри Чусовитинанинг натижасини яхшилай олди холос. Шу тариқа Чусовитина мусобақанинг кумуш медалини қўлга киритмоқда. Шоҳсупанинг учинчи поғонасидан мексикалик Алекса Морено жой олди.

Спорт гимнастикаси. Жаҳон кубоги. 
Аёллар, таяниб сакраш
1. Жейд Кэри (АҚШ) – 14,766
2. Оксана Чусовитина (Ўзбекистон) – 14,450
3. Алекса Морено (Мексика) – 14,249

Вакилимиз энди 20-23 март кунлари Дохада бўлиб ўтадиган навбатдаги жаҳон кубоги босқичига йўл олади. Янги регламентга кўра, айнан ушбу мусобақалар Токио-2020 Олимпиадаси квалификациясининг босқичлари ҳисобланади.