Буюк Британия билан Brexit масаласидаги музокаралар боши берк кўчага кириб қолди - ЕИ дипломатлари  

Евроиттифоқдаги дипломатик манбалар ЕИ ва Буюк Британия ўртасидаги Brexit’дан кейинги муносабатлар тўғрисидаги келишувни тайёрлаш бўйича музокаралар боши берк кўчага кириб қолди деб ҳисобламоқда. Бу ҳақда Reuters агентлиги хабар берди.

"Биз боши берк вазиятдамиз. Ечимини топиши мумкин бўлган кўплаб арзимас техник тафсилотлар мавжуд, аммо ҳар бир савол бўйича ҳар бир томон ўз мақсадига эришишга уринмоқда ва тафовутлар улкан. Буни сиёсий турткисиз ечиб бўлмайди, туртки эса йўқ", - дея европалик дипломатнинг сўзларидан иқтибос келтирмоқда агентлик.

Ўтган ҳафтада ўтказилган музокараларда асосий масалалар бўйича сезиларли силжишга эришилмади, навбатдаги музокаралар 11 майга белгиланган. 

Буюк Британия Европа Иттифоқини шу йилнинг 1 февралида тарк этди. Брюссель ва Лондон йил охирига қадар ўтиш даври тўғрисида келишиб олди. Томонлар бу вақт ичида келгуси муносабатларни қуриш тартиби тўғрисидаги ҳужжатни келишиб олиши керак.