Коронавируснинг янги штамми “Омикрон” деб номланди

Жаҳон соғлиқни сақлаш ташкилоти коронавируснинг ЖАРда аниқланган янги штаммини грек алифбосининг 15-ҳарфи билан “Омикрон” деб ном берди.

“ЖССТ B.1.1.529 штаммини “хавотир уйғотувчи вариант” деб топди, у “Омикрон” деб номланди”, — дейилади ташкилот хабарида.

Қайд этилишича, мазкур штаммда “кўплаб мутациялар бўлиб, уларнинг айримлари хавотирга солади”. 

ЖССТ маълумотига кўра, B.1.1.529 штамми илк марта 24 ноябрь куни ЖАРда аниқланган.

Коронавируснинг янги B.1.1.529 варианти Жанубий Африка, Ботсвана, Исроил, Ҳонгконг ва Белгияда аниқланган.

Янги вариант 32та мутацияга эга. Вирусологларнинг қайд этишича, вирус мутацияларининг кўплиги жуда жиддий муаммо.