Қўшимча функционаллар
-
Тунги кўриниш
Россиялик теннисчилар Уимблдон мусобақасига қўйилмайди
1 март куни Халқаро теннис федерацияси Россия ва Беларуснинг аъзолигини тўхтатган, бу мамлакатлардаги турнирларни бекор қилган ва уларнинг спортчиларини Дэвис Кубоги иштирокчилари таркибидан чиқариб юборганди.
Даниил Медведев / Фото: Reuters
Уимблдон мусобақаси ташкилотчилари россиялик ва беларуслик теннисчиларни турнирга қўймасликка қарор қилди. Бу ҳақда The New York Times ва Sportico нашрлари хабар берди. Ушбу қарор Россиянинг Украинадаги “ҳарбий операцияси” сабабли қабул қилинганлиги айтилмоқда.
Турнир 27 июндан 10 июлгача бўлиб ўтади. Мазкур мусобақада дунёнинг иккинчи ракеткаси Даниил Медведев, Андрей Рублев (ATP рейтингида 8-ўрин), Карен Хачанов (26), Аслан Карацев (30) ҳамда Анастасия Павлюченкова (WTA рейтингида 15-ўрин), Дарья Касаткина (26), Вероника Кудерметова (29) ва яна бир неча теннисчи қатнашиши лозим эди.
1 март куни Халқаро теннис федерацияси Россия ва Беларуснинг аъзолигини тўхтатган, бу мамлакатлардаги турнирларни бекор қилган ва уларнинг спортчиларини Дэвис Кубоги иштирокчилари таркибидан чиқариб юборганди.
WTA ва ATP Россия ва Беларус теннисчиларига турнирларда нейтрал мақомда қатнашишга рухсат берди. Буюк Британия Даниил Медведев Владимир Путинни қўллаб-қувватлашдан ёзма равишда воз кечган тақдирда Уимблдонга қўйилиши мумкинлигини билдирди.
