Электромобиллар сотувидан тушган 1,8 млрд сўмни талон-торож қилган МЧЖ раҳбари ўринбосари аниқланди

Бош прокуратура ҳузуридаги департаментнинг Мирзо Улуғбек туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган.

Унда, “F.E.” МЧЖ раҳбари ўринбосари Р.Ж. ва бошқалар МЧЖ томонидан чет давлатлардан олиб келинган электромобиллар сотувидан тушган 1,8 млрд сўмни харидорлар билан тузилган шартномаларнинг иккинчи нусхасида паст нархларда кўрсатиш орқали талон-торож қилганликлари аниқланган.

Шу каби, департаментнинг Қибрай туман бўлими томонидан терговга қадар текширув ўтказилган.

Унда, “W.E.” МЧЖ бош ҳисобчиси лавозимида ишлаган И.М. МЧЖ раҳбарининг имзосини сохта ҳужжатларни расмийлаштириш орқали МЧЖдан ишдан бўшаган 6 нафар ва 1 нафар умуман ишламаган фуқаронинг пластик карталарига 125,1 млн сўм ҳамда бош директорнинг имзосини сохталаштириб 273,2 млн сўмни ўзининг пластик картасига ўтказиб олиб, ўзлаштирганлиги аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.