РФ Мудофаа вазирлиги: Киевнинг майдаги йўқотишлари - 35 мингдан ортиқ ҳарбий

2024 йил май ойида Украина Қуролли кучлари 35 мингдан ортиқ ҳарбий хизматчи ва 2700 дан ортиқ қурол-яроғини йўқотди, деди Россия мудофаа вазири Андрей Белоусов 31 май, жума куни Олмаотада бўлиб ўтган КХШТ Мудофаа вазирлари кенгаши йиғилишида сўзлаган нутқида. 

Сергей Шойгу ўрнига Путин томонидан тайинланган Белоусов Украинадаги ҳарбий йўқотишлар ҳақидаги статистик маълумотларнинг русча версиясини ҳам тақдим этди: «Улар орасида 290 та танк ва зирҳли жанговар машиналар, жумладан, тўртта Abrams, еттита Leopard, 12 та Bradley бор». Бундан ташқари, Мудофаа вазирлиги янги раҳбарининг сўзларига кўра, «11 самолёт ва тўртта вертолёт уриб туширилган, 730 дала артиллерияси ва кўплаб ракета тизимлари йўқ қилинган». 

Май ойида Россия Қуролли кучлари мингдан ортиқ учувчисиз учиш аппаратлари, икки юз элликдан ортиқ HIMARS ва Vampire реактив снарядлари, 80 дан ортиқ Hummer бошқариладиган авиабомбалари, 50 та ATACMS оператив-тактик ракеталари ва саккизта Scalp қанотли ракеталарини тутиб олди», — дея хулоса қилди Россия вазири.

Белоусов, шунингдек, Россия қўшинлари Харкив вилоятидаги ҳарбий амалиётлар натижасида Украина ҳудудига 8-9 километр ичкарига кириб бориб, 28 та аҳоли пунктини эгаллаганини айтди. «Умуман олганда, бу йил 880 квадрат километр ҳудуд Россия армияси назоратига ўтди», деди Белоусов. 

Украина Бош штаби: Сўнгги 24 соат ичида Россиянинг йўқотишлари 1390 нафар ҳарбийга кўпайди 

Айни пайтда, Украинадаги Россия қўшинлари Украина Қуролли кучлари мудофаасини ёриб ўтишга уриниб, оғир йўқотишларга учрашда давом этмоқда. 30 май куни рус қўшинларининг йўқотишлари 1390 кишига кўпайиб, 507 650 кишига етди, бундан ташқари, сўнгги 24 соат ичида украиналик ҳимоячилар 18 та танк, 22 зирҳли жанговар машина ва 39 та душман артиллерия тизимини йўқ қилди. Бу ҳақда Украина Қуролли кучлари Бош штаби 31 май кунги хабарномасида айтилган. 

Унда, шунингдек, Россиянинг Украинага ҳужуми давомида РФнинг транспорт воситалари ва юк машиналари (53), қанотли ракеталар (7) ва дронлар (55), шунингдек, ракета артиллерияси (1088), самолётлар (357), вертолётлар (326), ҳаво мудофаа воситалари (815) ва кемалар (27) бўйича йўқотишлари кўрсатилган. 

Шолц: Россия Украинада ҳар ой 24 минг аскарини йўқотмоқда

«Ойига 24 минг россиялик аскар (Украина билан урушда) ҳалок бўлгани ёки оғир яраланганидан далолат берувчи рақамлар бор», — деди Германия канцлери Олаф Шолц 26 май куни «Фуқаролик мулоқоти» тадбирида. 

Шолц таъкидлашича, Россия армиясининг йўқотишлари, шунингдек, кўплаб украиналик аскарлар ва тинч аҳолининг ўлими «империалистик мегаломания» натижасидир. Россия Федерацияси Украина ва Беларусни Россиянинг бир қисми деб ҳисоблайди ва шунинг учун Европада ўнлаб йиллар давомида амал қилиб келаётган чегаралар дахлсизлиги тамойилини бузди, дея таъкидлади Германия канцлери.

Иккала томоннинг йўқотишлари ҳақида расмий маълумотлар йўқ 

Украинага қарши кенг кўламли уруш пайтида Россия армиясининг йўқотишлари ҳақида ишончли маълумотлар йўқ. «Медиазона» нашри ва BBC рус хизмати журналистлари кўнгиллилар билан биргаликда 2024 йил апрелига қадар очиқ манбалардан 50 мингдан ортиқ ҳалок бўлган россиялик ҳарбийлар исмини аниқладилар. Худди шу ойда Британия Мудофаа вазирлиги Россиянинг ушбу урушдаги эҳтимолий йўқотишларини 450 минг киши атрофида баҳолади. АҚШ Марказий разведка бошқармаси раҳбари Уилям Бернс январ ойида 315 минг россиялик ҳарбий ҳалок бўлгани ҳақида гапирди. 

Украина Қуролли кучларининг бу вақт ичида йўқотишлари ҳақида ҳам расмий маълумотлар йўқ. 2024 йил февралида Украина президенти Володимир Зеленский илк бор 31 минг украиналик аскар ҳалок бўлганини эълон қилган эди.