Қиш учун 600 минг тонна кўмир ва 350 минг тонна мазут захираси яратилади

Президент ҳузурида 10 июн куни бўлиб ўтган йиғилишда электр энергиясини ишлаб чиқаришни кўпайтириш масалалари кўриб чиқилди.

Маълум қилинишича, барча генерация манбалари ҳисобидан жорий йилда 4 гигаваттлик электр станцияларини ишга тушириш режалаштирилган. 11 та қуёш ва 3 та шамол станцияси шулар жумласидан.

Бундан ташқари, 850 километр магистрал тармоқ ва 9 та подстанцияни капитал таъмирлаш, 595 километр электр тармоғи ва 4 та янги подстанцияни ишга тушириш режалари белгилаб олинди.

Иссиқлик электр станциялари барқарор ишлаши, аҳоли ва ижтимоий соҳа эҳтиёжлари учун жорий йилда кўмир қазиб чиқаришни янада кўпайтириш ва бу борада 8 миллион тонналик кўрсаткичга интилиш зарурлиги қайд этилди.

Бундан ташқари, кўмир импорти учун уч йил муддатга револвер кредитлар берилади. Мазут ва кўмир 2 йилга бождан озод қилинади (бу маҳсулотлар учун амалда ҳам импорт божининг 0 фоизлик ставкаси амал қилмоқда).

Мутасаддилар ва ҳокимлар олдига яқин муддатда аҳоли ва ижтимоий соҳа учун 1 миллион 200 минг тонна, йил якунигача яна шунча кўмир етказиб бериш, 1 октябргача 600 минг тонна кўмир ва 350 минг тонна мазут захирасини яратиш вазифаси қўйилди.

Қўшимча қилинишича, газ босими паст, йўқотишлар юқори бўлган маҳаллалардаги хонадонларнинг газ таъминотини уч босқичли тизимдан икки босқичлига ўтказиш режалаштирилган.

Умуман, куз-қиш мавсумини беталафот ўтказиш мақсадида Энергетика вазирлиги раҳбарлари ҳудудларга бириктириладиган бўлди.

Маълумот учун, энергетика вазири Жўрабек Мирзамаҳмудов 2023 йил ноябр ойида парламентдаги чиқишида қиш учун 340 минг тонна мазут ғамлаб қўйилгани, 2022 йилда бу кўрсаткич 47 минг тонна бўлганини айтганди.