Роналдунинг янги рекорди, VAR’га ютқазаётган Лукаку ва Полшанинг тўхташи. Евро иккинчи туридаги 10 воқеа

Туркиянинг кулгили автогол

Португалия билан ўйинда Винченцо Монтелла шогирдлари ҳозирча Европа чемпионатининг энг кутилмаган голини уюштиришди.

Барчаси Канселунинг хатосидан бошланди, у Роналдуга пас беришда хатога йўл қўйди. Жамоа сардори ундан жаҳли чиқиб, бақира бошлаганида турклар тўпни эгаллашди ва вазият бартараф этилгандек кўринаётганди. Бу ҳолатда ҳатто трансляция режиссёри ҳам эътиборини бошқа томонга қаратганди.

Ва шунда энг қизиқ жойи рўй берди: Оқойдин дарвозабонга қарамади ва тўпни ортга узатди, Байиндир эса бу вақтда жойини ўзгартирганди ва тўп ундан бир неча метр наридан юмалаб ўтиб кетди. Челикнинг тўпга етиб олишга бўлган уринишлари наф бермади. Аҳмоқона автогол.

Автогол тўпурарлар пойгасида илгарилаб кетмоқда

Германиядаги турнирда энг яхши тўпурар — Автогол бўлиб қолмоқда. Ўтган икки тур давомида урилган 61 голдан 6 таси унинг номига ёзилган.

Европа чемпионати якунигача ҳали уч ҳафта бор, шунинг учун футболчилар ўз жамоалари дарвозасига урган голлар сони бўйича олдинги Еврода урилган рекорд (11) янгиланиши мумкин.

Левандовски ва компания — плей-оффдан четда

Полша миллий жамоаси қаторасига икки ўйинда ютқазди ва биринчи бўлиб плей-оффга чиқиш имкониятини йўқотди. Гуруҳдаги иккинчи ўйинда Франция ва Нидерландия ўзаро дуранг ўйнагани бунга сабаб бўлди (0:0).

Энди Михал Пробеж жамоаси гуруҳда тўртинчи ўриндан юқорига кўтарила олмайди. Полшаликлар французлар ва нидерландларни очколар сони бўйича қувиб ета олмаслиги аниқ, австрияликлар билан эса очколар сони бўйича тенглашса ҳам, ўзаро ўйиндаги мағлубият сабабли (1:3) тенглаша олмайди.

Испания, Германия ва Португалия гуруҳдан чиқиб бўлди

Учта топ-жамоа икки турда ҳам ғалаба қозонди ва муддатидан олдин 1/8 финал йўлланмасини кафолатлади.

Испания ва Португалия учинчи тур ўйинлари натижасидан қатъи назар ўз гуруҳларида биринчи ўринда қолиши маълум бўлган, немислар эса квартет етакчиси бўлиб қолиши учун Швейцарияга ютқазмаслиги етарли бўлади.

Умуман олганда, бу уч жамоа олдиндан турнир фаворитлари сифатида кўрилаётганди ва бўлиши керак иш содир бўлди.

Тарихий дуранг

Йирик турнирларда дебют қилган Гуржистон Европа чемпионатидаги илк очкосини қўлга киритди. Жамоа қийинчилик билан бўлса-да, Чехия босимига дош беролди (1:1).

Учрашувнинг асосий қаҳрамони — дарвозабон Мамардашвили бўлди, у ўйин давомида 11 зарбани қайтарди. Opta маълумотига кўра, Георгийнинг саъй-ҳаракатлари билан Гуржистон дарвозасига кириши керак бўлган 3,2 гол (xG) тўхтатилган. Бундай перформансдан кейин унда «Валенсия»ни топ-клубга алмаштириш имконияти кескин ортди.

Дастлабки ноллар

Юлдузли номлар майдонни голсиз тарк этишга мажбур бўлишди. Французлар ҳам, нидерландлар ҳам ҳарчанд ҳаракат қилмасин, дарвозани ишғол эта олишмади. Якунда Евро-2024 давомидаги илк нурсиз дуранг қайд этилди.

Бундан ташқари, ўзига хос серия барҳам топди: бунга қадар Европа чемпионатида 0:0 ҳисоби 2021 йилда Англия ва Шотландия миллий жамоалари ўйинида қайд этилганди. Шундан кейин турнирда кейинги голсиз дуранггача роппа-роса 50 ўйин ўтказилганди.

Криштиану ва унинг навбатдаги ютуғи

Ҳар сафар Роналду ҳали ҳам забт этмаган рекордлари борлиги билан ҳайратга солмоқда.

Туркия билан ўйинда 39 ёшли форвард учинчи голда узатма бериб, Евро тарихидаги энг яхши ассистентга айланди. Криштиану учун бу Евронинг финал қисмларидаги 27 ўйинда еттинчи бор голга ҳаммуллифлик қилишидир. У чехиялик Карел Поборскини (6 ассист) ортда қолдирди. Бундан ташқари, Роналду — Евроларда ассист амалга оширган энг ёши катта футболчи сифатида ҳам тарихга кирди.

Энг ҳайратланарли томони — Рон ўзи учун ноодатий ҳолда голли узатма берди: 2 га 1 вазиятда ўзи ҳам гол уриши осон бўлган ҳолатда тўпни Бруну Фернандешга ташлаб берди. Роналду ёши улғайган сайин мухлисларга янада кўпроқ ёқиб бормоқда.

Дарвозабоннинг голли узатмаси

Белгия миллий жамоаси Руминия устидан муҳим ғалабага эришди: Тилеманснинг тезкор голидан кейин иккинчи бўлим охирида де Брюйне «қизил иблислар» устунлигини мустаҳкамлади, у жарима майдонига ёриб кирди ва яккама-якка вазиятдан фойдаланди.

Иккинчи гол урилган эпизодда пасни белгияликлар посбони Кастелс берди, унинг узатмаси бутун майдон бўйлаб ўтди. У Куртуа жамоага чақирилмаганидан кейин биринчи рақамни олган дарвозабон.

Қайд этамиз: Евро-2024 чемпионатида дарвозабонларнинг илк самарали голли ҳаракати.

Омадсиз Лукаку

Ромелу Германиядаги турнирда ҳам мемлар қаҳрамони бўлишда давом этмоқда. Словакия билан ўйинда (0:1) ундан икки голни тортиб олишди, Руминияга қарши ўйинда — яна битта. Ва барча ҳолатларда VAR аралашувидан кейин.

У ҳеч қанақасига гол ура олмаяпти. Бу — тавқи лаънатми ёки шунчаки омади келмаяптими? Ушбу ҳужумчи учинчи турда порлаши ҳам мумкин, аммо ҳозирча шундай: VAR — Лукаку 3:0.

Канте ҳали ҳам топ даражада!

Кўплар ушбу яримҳимоячи Франция миллий жамоасига чақирилганига ишончсизлик билан қараганди. 33 ёшли футболчи нафақат Саудия Арабистони чемпионатидан Еврога чақирилди — у жамоага икки йиллик танаффусдан кейин қайтганди. Вақт кўрсатдики, Диде Дешам бу масалада мутлақо ҳақ бўлган.

Икки ўйинда Канте 90 дақиқадан ҳаракат қилди, ҳаммаёққа улгурди ва майдон марказини энг яхши йилларидаги каби бетонлаб ташлади. Табиийки, унинг муваффақиятини эътиборсиз қолдириб бўлмасди.

Нголо бу турнирда қаторасига икки бор ўйиннинг энг яхшиси деб топилган илк футболчиси бўлди. Афтидан, Саудия Арабистонига кетиши ушбу доимо табассум қилиб турувчи йигитга ижобий таъсир кўрсатган.