Италиянинг тўхташи ва тарихий момақалдироқ. Евро плей-оффининг биринчи куни қандай ўтди?

Гуруҳ босқичидаги қатор нурсиз ўйинлар ва икки томон учун ҳам фойдали дуранглардан кейин ҳақиқий Евро — плей-офф ўйинлари бошланди. Бу босқичнинг илк ўйинида Швейцария ва Италия ҳамда Германия ва Дания жуфтликлари турнирни ким давом эттиришини ҳал қилишди. Икки учрашув ҳам қизиқарли ва ҳаяжонли лаҳзаларга бой кечди.

Италиянинг «сенсацион» чиқиб кетиши

Швейцария — Италия 2:0
Голлар: Фройлер (37), Варгас (46).
Швейцария: Зоммер, Родригес, Шер, Аканжи, Эбишер (Штефан, 90+2), Жака, Фройлер, Варгас (Цубер, 71), Ридер (Стергиу, 71), Ндойе (Сиерро, 77), Эмболо (Дуа, 77).
Италия: Доннарумма, Ди Лоренцо, Манчини, Бастони, Дармиан (Камбиязо, 75), Кристанте (Пеллегрини, 75), Барелла (Ретеги, 64), Фажиоли (Фраттези, 86), Ал-Шаъровий (Заккани, 46), Киеза, Скамакка.
Огоҳлантиришлар: Барелла (35), Ал-Шаъровий (45), Манчини (57).

Италянлар Еврога амалдаги чемпионлар мақомида келган — улар титулни ҳимоя қилиши талаб этиларди. Бош мураббий лавозимида Роберто Манчини ўрнига келган Лучано Спаллетти бу мақсад йўлида таркибни жиддий даражада ўзгартирди. 2020 йилги Европа чемпионати ғолиби бўлган «эскилар»дан кўпчилиги бу сафарги турнирни уйда кузатишди. Уларнинг айримлари фаолиятини якунлашга ҳам улгурган.

Италия турнирни яхши бошлади, аммо якунда гуруҳдан катта қийинчилик билан чиқди. Барчасини Хорватияга қарши кечган учинчи ўйин ҳал қилди — унда «Скуадра адзурра» охирги сонияларга қадар ютқазаётганди. Фақат Дзакканя ҳисобни тенглаштирувчи голни урди. Акс ҳолда жамоа турнирни гуруҳ босқичидаёқ якунлаши мумкин эди.

Аммо Испания ва Италияга қарши ўйинлардан кейин Италиянинг бу сафарги турнирда узоққа боришига шубҳалар пайдо бўлганди. Лучано Спаллеттининг сўзлари эса жамоадаги ҳолатни кўрсатиб берди. Хорватия билан ўйиндан  бош мураббий журналистларни ҳақоратлади ва ўз жамоаси футболчиларини маълумот сиздиришда айблади. Италияликлар лагеридаги муҳит заҳарли экани маълум бўлди.

Жамоанинг 1/8 финал йўлланмаси учун рақиби швейцарияликлар эди. Швейцария гуруҳ босқичини жуда яхши ўтказди: Венгрияга ҳеч қандай имконият қолдирмади (3:1), Шотландия ҳамда Германия билан очколарни бўлишиб олди (1:1). Мурат Яқин шогирдлари плей-оффга иккинчи ўрин билан чиқди, лекин немисларга қарши ўйинда сўнгги дақиқаларда ғалабани қўлдан бой бермаганида биринчи бўлиши ҳам мумкин эди.

Ўйиндан олдин ҳам футбол экспертлари кейинги босқичга чиқиш учун Швейцарияда имконият кўпроқ эканини тахмин қилишаётганди. Лучано Спаллетти турнир давомида оптимал таркибга эриша олмади. У Швейцарияга қарши ўйин учун бошланғич таркиби билан барчани ажаблантирди. Захира футболчилари бўлган Стефан Ал-Шаъровий, Николо Фажиоли, Бриан Кристанте, Жанлука Манчини кабилар илк дақиқалардан майдонда ҳаракат қилди.

Бу тажриба ўзини оқламади. Италия жуда кучсиз ўйин кўрсатди, 90 дақиқа давомида атиги бир бор дарвоза соҳаси томон тўғри борган биргина зарба йўллади. Италянлар учун энг хавфли вазиятни эса Швейцария миллий жамоаси ҳимоячиси Фабиан Шер яратиб берди. У ўз дарвозаси тўрини ишғол этиб қўйишига бир бахя қолди. Федерико Киеза вазиятлар яратишга уринди, аммо жамоадошлари унинг уринишларини қўлламади.

Швейцарияликлар эса ижобий маънода ҳайрон қолдиришди. Жамоа ортиқча нимадир кўрсатмади, футболчилар ўз даражасида ўйнаши Италияни мағлуб этиш учун етарли бўлди. Швейцария юқори прессинг уюштирди, чиройли комбинациялар амалга оширди, ҳимоя вакиллари италияликларнинг ҳужумларини тўхтатди ва Фройлер ҳамда Варгаснинг аниқ зарбалари эвазига ишончли ғалабага эришиб, 1/8 финал йўлланмасини қўлга киритди.

Кейинги босқичда Швейцария миллий жамоаси Англия — Словакия жуфтлиги ғолиби билан ўйнайди.

Момақалдироқ ва омадсиз Андерсен

Германия — Дания 2:0
Голлар: Ҳавертц (53, пеналти), Мусиала (68).
Германия – Нойер, Рюдигер, Шлоттербек, Раум (Ҳенрикс, 80), Кроос, Гундўған (Фюллкруг, 65), Андриҳ (Жан, 64), Киммиҳ, Ҳавертц, Сане (Антон, 88), Мусиала (Виртц, 81).
Дания – Шмейҳел, Ба (Кристиансен, 81), Вестергор, Кристенсен (Бруун Ларсен, 81), Андерсен, Мэле, Дилэйни (Нёргор, 69), Эриксен, Ҳёйберг, Олсен (Поулсен, 69), Ҳойлунд (Винд, 81).
Огоҳлантиришлар: Андерсен (57), Мэле (60).

Турнир мезбонлари гуруҳ босқичини кучли ўтказди ва биринчи бўлиб плей-офф йўлланмасини қўлга киритди. Нагелсманн шогирдлари очилиш ўйинида Шотландияни йирик ҳисобда таслим этди (5:1), Венгрияга қарши ўйинда муаммога учрамади (2:0) ва Швейцария билан ўйинда характер кўрсатиб, очко олди (1:1). 1/8 финалда немисларни Данияга қарши ўйин кутаётганди, бу жамоа плей-оффга энг зерикарли гуруҳдан чиққанди. Данияликлар уч ўйинда ҳам дуранг қайд этди: Словения ва Англия билан бир хилда — 1:1 ҳисоби қайд этилди, Сербия билан ўйида мухлислар гол кўришмади (0:0). Шунинг ўзи дуранг учун етарли бўлганди.

Данияликлар — ҳозир ҳам хавфли рақиб, аммо 2021 йилги кучли иштиёққа эга жамоадан асар ҳам қолмаган ва ҳеч ким бу жамоадан немисларга жиддий қаршилик кўрсатишини кутмаётганди ҳам.

Лекин ўйиннинг биринчи бўлимида майдонда ақл бовар қилмас ҳодисалар рўй берди. Дастлабки ўн дақиқа немисларнинг кучли босими остида ўтди, бу вақт оралиғида Нико Шлоттербекнинг голи жарима майдонидаги фол туфайли бекор қилинди.

Кейин вазият нисбатан тенглашди, кейин эса барчаси тўхтаб қолди — кучли момақалдироқ ва жала қуйиши туфайли.

Германияда бир неча кундан буён ёмғирли ҳаво кузатилмоқда — ёғинлар ўйин ўтказилган Дортмунддаги стадионга ҳам етиб борди. Ўйин вақтида бутун осмонни чақмоқ қоплаб олди, УЕФА эса бундай шароитда ўйин ўтказишга рухсат бермаган, шунинг учун 33-дақиқада бош ҳакам Майкл Оливер футболчиларни майдондан олиб кетди.

Танаффус 25 дақиқага яқин давом этди. Стадион сув оқимидан яхши ҳимояланмагани маълум бўлди ва том остида бўлмаган томошабинлар яшириниш учун жой қидиришга мажбур бўлишди.

Ёмғир тинганидан кейин ўйин давом эттирилди. Лекин қарийб ярим соатлик пауза ўйин суръатини тушириб юборганди — футболчилар фақат иккинчи бўлимда тезлик қўшишди. 

48-дақиқада данияликлар ҳимоячиси Йоаким Андерсен ҳисобни очди, 50-дақиқада гол Дилейнидаги офсайд туфайли бекор қилинди.

51-дақиқада эса у ўз жамоаси жарима майдонида қўли билан ўйнаб, пеналти белгиланишига сабабчи бўлди — Ҳавертц зарбани аниқ ижро этди.

Кейин эса немисларни тўхтатиб бўлмади, Нагелсман яримҳимоячи Гундўған ўрнига Фюллкругни туширди ва жамоа уч ҳужумчи билан ҳаракат қила бошлади. 68-дақиқада бу ўз самарасини берди, Мусиала турнирдаги учинчи голини уриб, ҳисобни ишончли кўринишга келтирди. Ҳисоб янада йириклашиб кетиши ҳам мумкин эди, аммо Ҳавертц ва Вирц қулай вазиятлардан фойдалана олмади, Фюллкруг қўшимча дақиқаларда дарвозани ишғол этди ҳам, аммо унда ҳам офсайд қайд этилди. 

Ишончли ғалабадан кейин Бундестим соврин учун курашни давом эттирмоқда. Чоракфиналда жамоа Испания — Гуржистон жуфтлиги ғолибига қарши баҳс олиб боради.