Қозоғистон ва Ўзбекистон чегарасида юзлаб юк машиналари тўпланиб қолди

Қозоғистон Молия вазирлигининг Давлат даромадлари қўмитаси Қозоғистон-Ўзбекистон чегарасидаги «Тажен» назорат-ўтказиш пунктида юк ташиш машиналари сезиларли даражада тўплангани ҳақида маълум қилди.

Департамент маълумотларига кўра, 400 дан ортиқ юк машинаси Қозоғистонни тарк этишни кутмоқда.

«Автомобил оқимининг кўпайишига Ўзбекистонда «Довуд ота – Қўнғирот» (400 километр) автомобил йўлининг очилиши сабаб бўлди, бу эса юк ташувчи транспорт воситаларининг оқимига олиб келди», дейилади хабарда.

Департаментнинг тушунтиришича, «Тажен» пункти бир йўналишда кунига 150 та юк машинасига мўлжалланган лойиҳа қувватига қарамай, реконструкция қилинаётган пункт ходимлари кунига 200–250 тагача автомобилнинг ўтишини таъминламоқда.

Мавжуд вазиятдан келиб чиқиб, қўмита юк ташувчиларга эҳтимолий кечикишларни ҳисобга олишни ва иложи бўлса, чегарада узоқ кутишларга йўл қўймаслик учун юк ташишнинг муқобил йўналишларини танлашни тавсия қилди.