Кипр НАТОга кириш ниятида

Кипр Республикаси президенти Никос Христодулидис ўз мамлакатининг НАТОга аъзо бўлиш ниятини тасдиқлади. 28 ноябр, пайшанба куни у журналистларга Никосия Вашингтон билан иттифоққа қўшилиш йўллари бўйича музокаралар олиб бораётганини айтди. Унинг сўзларига кўра, Туркиянинг эътирозлари туфайли Кипр Республикасининг НАТОга аъзо давлат бўла олмаслиги мамлакат армиясини ҳам модернизация қилиш, ҳам ҳарбий техника олиш учун кўплаб имкониятлардан маҳрум қилади. Христодулидис таъкидлашича, Кипр Қўшма Штатлар билан республиканинг Шимолий Атлантика алянсидаги аъзолигининг учта таклиф қилинган даражасини муҳокама қилмоқда.

Никос Христодулидис Кипрнинг тийиб туриш имкониятларини кучайтириш муҳим аҳамиятга эга эканлигини таъкидлаб, мамлакат бу ерда ҳам НАТО, ҳам АҚШ орқали, шунингдек, орол иштирок этаётган Европа Иттифоқи мудофаа дастурлари орқали имкониятлар излаётганини аниқ кўрсатди. Христодулидис Кипрнинг асосий афзаллиги оролнинг географик жойлашуви эканини айтиб, уни «алоҳида геостратегик аҳамиятга эга» деб атади. У, шунингдек, оролнинг ҳарбий-денгиз ва ҳаво базаларини модернизация қилиш бўйича қарорлар аллақачон қабул қилинганини ва Кипр Европа Иттифоқи билан денгиз иншоотлари ва АҚШ билан ҳаво кучлари бўйича музокаралар олиб бораётганини тасдиқлади.

НАТОга аъзо бўлиш учун потенциал ариза бериш муддати ҳақида сўралганда, президент шундай жавоб берди: «Биз бу ҳақда қанча кам гапирсак, мақсадимизга шунчалик яқинлашамиз».

Кипрнинг НАТОга қабул қилиниши муҳим прецедент бўлиши мумкин

24 ноябр куни Грециянинг «Катимерини» газетаси мамлакатни Шимолий Атлантика алянсига босқичма-босқич яқинлаштириш стратегияси Христодулидиснинг октябр ойи охирида АҚШ президенти Жо Байден билан бўлган учрашувида диққат марказида бўлганини хабар қилди. Таъкидланишича, батафсил ва пухта ўйланган режа узоқ муддатли даврга мўлжалланган ва бир-бирига боғлиқ бўлган кўплаб босқичлардан иборат.

Кипрнинг НАТОга қабул қилиниши муҳим прецедент бўлиши мумкин. Алянс қоидаларига кўра, ҳудудий муаммолари ҳал этилмаган давлат унга киритилиши мумкин эмас. Кипр Республикаси худди шу номдаги оролнинг қарийб 60 фоизини назорат қилади, қолган қисмини тан олинмаган Шимолий Кипр Турк Республикаси эгаллайди. Кипрнинг НАТОга муваффақиятли аъзо бўлиш истиқболлари бевосита Кипр можаросининг ҳал қилинишига ва Туркия билан муносабатларнинг яхшиланишига боғлиқ.