Зеленский Парижда Трамп ва Макрон билан учрашди

Украина президенти Володимир Зеленский Париждаги Елисей саройида АҚШнинг янги сайланган президенти Доналд Трамп ва Франция президенти Эммануэл Макрон билан учрашди. 

Зеленский мазкур учрашувни «сермаҳсул» деб атади. «Президент Трамп доимгидек қатъий. Бунинг учун раҳмат», — деб ёзади Украина президенти ўзининг Telegramʼдаги каналига.

Зеленскийнинг таъкидлашича, уч томонлама учрашувда «одамлар, жанг майдонидаги вазият ва Украина учун адолатли тинчлик тўғрисида гапирилган».

«Барчамиз ушбу урушни имкон қадар тезроқ ва адолатли тугатишни истаймиз. Биз ишлашни давом эттиришга келишиб олдик. Куч билан тинчликка эришиш мумкин!», — дея қўшимча қилади у.

Зеленский ва Трамп Парижга реставрация қилинган Нотр-Дам соборининг очилишига бағишланган тантанли маросимга ташриф буюрди. Трамп АҚШ президентлиги сайловларида ғалаба қозонганидан кейин биринчи марта Зеленский билан учрашмоқда. 

2019 йилнинг 15 апрел куни Франция пойтахтининг асосий рамзларидан бири бўлган готика услубидаги Нотр-Дам соборида кучли ёнғин содир бўлганди. Собор гумбазли шифтининг қисмлари вайрон бўлган, XIX асрга тегишли шпил қулаб тушган ва ички қисми катта зарар кўрган. Ёнғин содир бўлган кечадаёқ Франция президенти Эммануэл Макрон Нотр-Дамнинг беш йил ичида қайта тикланишига ва «ҳар доимгидан ҳам гўзал» бўлишига ваъда берган эди.