Немисларнинг аксарияти ҳукумат миграция сиёсатини танқид қиляпти

Германиянинг тўрт нафар фуқаросидан уч нафари Германия ҳукумати ноқонуний миграциянинг олдини олиш учун етарлича ҳаракат қилмаяпти, деб ҳисоблайди. 8 декабр, якшанба куни эълон қилинган dpa агентлиги буюртмаси билан YouGov социологик институти томонидан ўтказилган сўров натижаси шундан далолат бермоқда. Тадқиқотнинг ўзи, dpa қайд этишича, 29 ноябрдан 3 декабргача давом этган.

Сўров натижаларига кўра, немисларнинг атиги 14 фоизи федерал ҳукумат муаммони ҳал қилиш учун етарли чора кўраётганига ишонади. Респондентларнинг яна 11 фоизи аниқ жавоб беришга қийналган. Бундан ташқари, ҳар иккинчи немис меҳнат миграциясини бошқариш соҳасини ҳали ҳам такомиллаштириш учун имкониятлар мавжуд деб ҳисоблайди.

Умуман олганда, респондентларнинг 93 фоизи ноқонуний миграцияни муаммо деб ҳисоблайди, 51 фоизи муаммони «жуда катта», 27 фоизи эса «жиддий» сифатида кўради. Ҳар етти немисдан бири буни «аҳамиятсиз» деб ҳисоблайди ва сўровда қатнашганларнинг атиги икки фоизи Европа Иттифоқига аъзо бўлмаганларнинг Германияга кириш ёки яшаш учун рухсатномасиз қолишида муаммо йўқлигини кўрмоқда. Ҳар иккинчи немис фуқароси сўнгги ўн йил ичида иммиграция Германия учун ёмон натижалар келтирганига ишонади.

Германия меҳнат ресурслари истиқболлари

YouGov томонидан Германия ҳукумати Европа Иттифоқига аъзо бўлмаган потенциал ишчиларнинг иммиграциясини осонлаштириш учун етарлича ҳаракат қиляптими ёки йўқми деган саволга сўралганларнинг 30 фоизи «ҳа» деб жавоб берган бўлса, 50 фоизга яқини «етарли эмас» деди. Ҳар бешинчи одам бу борада аниқ фикрга эга эмас. Мутахассисларнинг фикрича, Германия иқтисодиёти пасайишининг сабабларидан бири саноатнинг кўплаб тармоқларида ишчи кучи етишмаслигидир.

Ўз навбатида, Германия социал-демократик партияси (ГСДП)га яқин бўлган Фридрих Эберт жамғармаси ўзининг яқинда ўтказган тадқиқотида хорижлик мутахассислар Германияда ўзини яхши ҳис қилмаётгани ва интеграцияда қийинчиликларга дуч келаётгани ҳақидаги хулосани тақдим этди. Сўров натижаларига кўра, мамлакатни тарк этган 400 га яқин хорижлик мутахассислар Германияда меҳмондўстлик маданиятининг йўқлигини кетишининг асосий сабаби сифатида тилга олган. Респондентларнинг 38 фоизи Германияда ўзини уйдагидек ҳис қилмаётганини, 27 фоизи эса яхши қабул қилинмаганини айтган. Шу билан бирга, Германиядаги ишидан норози бўлганлар атиги 27 фоизга тенг. Сўровда иштирок этганлар яшаш нархининг юқорилиги ва солиқларнинг юқорилигидан ҳам шикоят қилган. Респондентларнинг 24 фоизи ирқчилик ва дискриминацияни кўчиб кетишга сабаб сифатида кўрсатган.