ГФРда ХДИ/ХСИнинг икки аъзоси Озарбойжонга пора эвазига ёрдам берганликда айбланмоқда

13 декабр, жума куни суд матбуот котибининг маълум қилишича, Бундестагнинг мухолиф консерватив ХДИ/ХСИ блокидан бўлган икки собиқ депутати «Озарбойжон иши» деб аталадиган иш бўйича порахўрликда айбланиб, Мюнхен Олий минтақавий суди олдида жавоб беради. Münchner Merkur газетаси унинг сўзларига таяниб, жараён 16 январда бошланиши кераклигини ёзмоқда.

Аксел Фишер ва Эдуард Линтнерга қарши «Озарбойжон иши»

«Озарбойжон иши» бўйича айбланувчилар карлсруэлик Аксел Фишер ва Қуйи Франкониянинг Бавария округидан Эдуард Линтнер бўлди. Улардан биринчиси порахўрликда, иккинчиси эса Европа кенгаши парламент ассамблеяси (ЕКПА)да Озарбойжон фойдасига қарорлар қабул қилинишига таъсир ўтказиш учун сайланган мансабдор шахсларга пора беришда айбланган. Иккала гумонланувчи ҳам айбловларни рад этяпти.

Тергов маълумотларига кўра, 2010 йилдан бери ЕКПА иши қатнашган Линтнер 2016 йилда 19 та сохта компаниялар орқали бир неча миллион евро олган. Терговчиларнинг фикрича, у бу маблағнинг бир қисмини ўзи учун зарур бўлган қарорлар қабул қилинишига таъсир қилиши керак бўлган бошқа депутатларга ўтказган.

2010 йилдан бери ЕКПАда ишлаган Фишер Озарбойжон учун фойдали нутқлар қилган ва махфий ҳужжатларни юборган. Бунинг эвазига у 2016 йилда жами 21 800 евро миқдорида пора олгани айтилмоқда.