Конгода ўнлаб инсонлар ўлимига сабабчи бўлган номаълум касаллик безгакнинг оғир шакли бўлиб чиқди

Конго Демократик Республикасида (КДР) ўнлаб инсонларнинг ўлимига сабабчи бўлган номаълум касаллик безгакнинг оғир шакли экани маълум бўлди. Бу ҳақда мамлакат Соғлиқни сақлаш вазирлигига таяниб The Guardian хабар берди.

«Сир ва ниҳоят ошкор бўлди. Бу респиратор касаллик кўринишидаги безгакнинг оғир шаклидир», — дейилади вазирлик хабарида. Шунингдек, соғлиқни сақлаш идорасининг қўшимча қилишича, касаллик тарқалган Кванго провинцияси аҳолисининг тўйиб овқатланмаслиги уларни анча заиф қилиб қўйган.

КДР Соғлиқни сақлаш вазирлиги маълумотларига кўра, октябр ойидан бери 592 кишида ушбу касаллик аниқланган, ўлим даражаси эса 6,2 фоизни ташкил этмоқда.

Декабр бошларида Конго Демократик Республикасининг жануби-ғарбий провинциясида 143 киши номаълум касаллик оқибатида вафот этгани тўғрисида хабар берилганди. Кванго провинцияси губернатори ўринбосари Реми Саки ва маҳаллий Соғлиқни сақлаш вазирлиги раҳбари Аполлинер Юмба касалликка чалинганларда грипп белгилари, жумладан, тана ҳароратининг кўтарилиши ва кучли бош оғриғи кузатилганини маълум қилган. Ўз навбатида Жаҳон соғлиқни сақлаш ташкилоти мамлакатга эпидемиологлар, лаборантлар, юқумли касалликлар профилактикаси ва назорати бўйича экспертлардан иборат мутахассисларини юборган эди.