Ўзбекистон Афғонистон аҳолисига инсонпарварлик ёрдами ва «Саломатлик» поездини жўнатди

Сурхондарё вилояти ҳокимлиги матбуот хизматига кўра, жами 9 вагондан иборат «Саломатлик» тиббий-санитар ёрдами юборилган. 25−30 декабр кунлари Афғонистоннинг Балх вилоятида бир гуруҳ аҳоли малакали шифокорлар томонидан бепул тиббий кўрикдан ўтказилади.

«Мазкур инсонпарварлик ёрдами Ўзбекистон ва Афғонистон ҳукуматларининг учрашувида афғон халқини Ўзбекистон шифокорлари томонидан бепул тиббий кўрикдан ўтказишда кўмак кўрсатиш сўровига асосан амалга оширилмоқда», — дейилади хабарда.

Инсонпарварлик юклари Сурхондарё вилояти ҳокими Улуғбек Қосимов ҳамда Транспорт ва Ташқи ишлар вазирликлари, шунингдек, «Ўзбекистон темирйўллари» АЖ мутасаддилари томонидан етказиб берилган.

Эслатиб ўтамиз, жорий йил май ойида Ўзбекистон тошқинлардан жабр кўрган афғон халқига гуманитар ёрдам юборганди. Ўшанда инсонпарварлик ёрдами таркибидан 48 тонна ун, 22 тонна гуруч, 100 минг дона консерва ва 44 тонна макарон маҳсулотлари, 25 минг литр ўсимлик ёғи, 100 минг дона тез тайёрланадиган лағмон, шунингдек, 10 кишилик 100 та махсус қурилмали чодир ва 1000 литрли 96 та сув сақлаш идишлари ўрин олган эди.