O‘zbekistonlik futbolchi qizlar BAAga qarshi ikki o‘yinda 13ta gol urdi

Dubay shahrida yig‘in o‘tkazayotgan futbol bo‘yicha O‘zbekiston ayollar terma jamoasi Birlashgan Arab Amirliklari jamoasiga qarshi 2ta o‘rtoqlik uchrashuvi o‘tkazdi. O‘FF matbuot xizmati tarqatgan xabarga ko‘ra, jamoa 2018 yilgi Osiyo Kubogi musobaqasining saralash o‘yinlariga tayyorgarlik ko‘rayotgan jamoa 8 mart kuni BAAga qarshi ilk o‘yinda 8:1 hisobida g‘alaba qozongandi. O‘yinda Mahliyo Sarikova hamda Lianna Norbekova raqib darvozasiga uchtadan to‘p kiritgan bo‘lsa, Lyudmila Karachik va Kamola Risqiyeva bittadan golga mualliflik qildi. 

12 mart kungi bahs esa O‘zbekiston vakillarining 5:0 hisobidagi g‘alabasi bilan yakunlangan.

Osiyo Kubogining final bosqichiga yo‘l olish uchun O‘zbekiston ayollar terma jamoasi Janubiy Koreya, Hongkong, Hindiston hamda KXDR termalariga qarshi o‘yinlar o‘tkazadi. Saralash bosqichi uchrashuvlari 3-11 aprel kunlari bo‘lib o‘tadi. 

Ma'lumot uchun, O‘zbekiston ayollar terma jamoasini Sherali Boboqulov bosh murabbiy sifatida boshqaradi.

O‘rtoqlik uchrashuvi
Dubay, BAA
12 mart, yakshanba
BAA — O‘zbekiston 0:5
Gollar: Mahliyo Sarikova (0:1). Lianna Norbekova (0:2). Lyudmila Karachik (0:3). Dildora Nozimova (0:4). Mahfuza Turopova (0:5).