Politsiyachilar o‘g‘irlikda gumonlangan shaxsni ilon yordamida qiynashdi (video) 

Indoneziyada politsiyachilar o‘g‘irlikda gumonlanayotgan erkakni bahaybat bo‘g‘ma ilon yordamida qiynadilar. Havaskorlar tomonidan olingan videolavha The Guardian nashrida e'lon qilindi.

«Papuaslarni so‘roq qilishda ilonlardan foydalanish ancha keng tarqalgan amaliyot.  Sem Lokon — bunga yorqin misol bo‘la oladi», — degan advokat Veronika Koman. Lavhada qo‘llari bog‘langan erkak yerda o‘tiribdi, uning bo‘ynida esa 2 metrli ilon aylanyapti. Lokonni so‘roq qilayotgan politsiyachi ilonni uning yuziga yo‘naltirarkan, necha marta mobil telefon o‘g‘irlaganini qayta-qayta so‘raydi. Rolikda agar u o‘g‘riligini tan olmasa, ilonni og‘ziga yoki ishtoni ichiga qo‘yib yuborishini aytishadi.

Bu holat jamoatchilikka oshkor bo‘lganidan keyin katta noroziliklar tug‘ildi. Natijada, politsiya uzr so‘rashga majbur bo‘ldi. Amaldorlar xodimlarining bu ishlarini qattiq qoralab, ular qattiq jazolanganini bildirganlar. Mahalliy politsiya rahbari Tonni Ananda Svadayaning ma'lum qilishicha, bu qiynoq xodimlarning shaxsiy tashabbusiga ko‘ra amalga oshirilib, rahbariyatning bundan xabari bo‘lmagan. Shuningdek, ilon zaharsiz va qo‘lga o‘rgatilgan bo‘lgan.