O‘zini o‘zi moliyalashtirishga o‘tayotgan oliy ta'lim muassasalari ro‘yxati tasdiqlandi

«Oliy ta'lim muassasalarini bosqichma-bosqich o‘zini o‘zi moliyalashtirish tizimiga o‘tkazish to‘g‘risida» Hukumat qarori qabul qilindi.

Qaror bilan, 2020 yil 1 yanvardan boshlab, tajriba-sinov tariqasida o‘zini o‘zi moliyalashtirish tizimiga o‘tayotgan 10 ta oliy ta'lim muassasalari ro‘yxati tasdiqlandi.

Bunda ushbu OTMlarning ilmiy pedagogik salohiyati yuqoriligi, moliyaviy faoliyatining barqarorligi, moddiy-texnika bazasi yetarli darajadaligi, ta'lim xizmatlari bozorida mazkur mutaxassisliklarga talab yuqoriligi inobatga olindi.

Shuningdek, o‘zini o‘zi moliyalashtirish tizimiga o‘tayotgan OTMlarga bir qator qo‘shimcha vazifalar belgilandi.

Qo‘shimcha ta'lim xizmatlarini ko‘rsatish, iqtisodiyot tarmoqlari mutaxassislarining malakasini oshirish va boshqa pullik xizmatlarni joriy etish shular jumlasidan.

Qarorga ko‘ra, o‘zini-o‘zi moliyalashtirish tizimiga o‘tayotgan OTMda to‘lov-kontrakti asosida ta'lim olayotgan talabalarning kontrakt to‘lash muddatlari tomonlar kelishuviga ko‘ra shartnoma asosida belgilanadi.

Prezidentning 2019 yil 11 iyuldagi qarori bilan 2020 yildan boshlab ayrim OTMlar bosqichma-bosqich o‘zini o‘zi moliyalashtirish tizimiga o‘tishi belgilangan.