Burundining ko‘p yillik prezidenti vafot etdi

Afrikada joylashgan Burundi davlatining prezidenti Per Nkurunziza 56 yoshida vafot etdi. Nkurunzizaning vafotiga yurak xuruji sabab bo‘lgan.

Foto: burundi.mid.ru

“Burundi hukumati mamlakat prezidenti Per Nkurunziza 8 iyunda Karuzi provinsiyasidagi shifoxonada yurak xurujidan kutilmaganda vafot etganini chuqur afsus bilan ma'lum qiladi”, deyilgan hukumat xabarida.

Burundida 20 may kuni prezident saylovlari bo‘lib o‘tgandi. Nkurunziza unga yana 7 yillik 2 muddatga saylanishga ruxsat beruvchi yangi konstitutsiya ratifikatsiyasiga qaramay, saylovlarda ishtirok etishdan voz kechgan.

Nkurunziza mamlakatni 2005 yildan beri boshqarib kelgan.

Bungacha mamlakatda prezident vakolatlari muddati 5 yilni tashkil qilgan va prezident 3 ta muddatga saylana olgan. Agar Nkurunziza saylovlarda ishtirok etishga rozi bo‘lganda, prezident lavozimida 2034 yilgacha qolishi mumkin edi.

2020 yildagi saylovlarda Burundining hukmron partiyasi nomzodi general Evarist Ndayishimiye g‘alaba qozongan.

#prezident #Burundi #Per Nkurunziza