Toshkent viloyatida haykal qurish uchun 28 milliard, kutubxona qurish uchun esa 6 milliard so‘m mablag‘ ajratildi

Toshkent viloyati hokimi Davron Hidoyatov Nurafshon shahrida Zulfiya Zokirova haykal majmuasini qurish uchun 28,4 milliard so‘m hamda zamonaviy kutubxona binosini qurish uchun 6 milliard so‘m mablag‘ ajratish bo‘yicha farmoyish chiqardi.

Unga ko‘ra, jami 34,4 milliard so‘m mablag‘ Toshkent viloyati mahalliy budjetining 2021 yil III chorak yakunida shakllangan daromadlar rejasining orttirib bajarilgan qismi hisobidan «Toshkent viloyatida biznes markazlarini qurish direksiyasi» DUKka ajratiladi.

Shuningdek, farmoyishda viloyat hokimining avvalgi — 2021 yil 23 apreldagi farmoyishi asosida Nurafshon shahrida Zulfiya Zokirova nomiga haykal majmuasini qurish va atrofini obodonlashtirish ishlari uchun ajratilgan mablag‘dan ishlatilmagan 4,91 milliard so‘mlik qismini belgilangan tartibda viloyat mahalliy budjetiga qaytarish kerakligi aytilgan.

Toshkent viloyati Zangiota tumanidagi Xonobod qishlog‘ida yashagan Zulfiya Zokirova turmush o‘rtog‘i vafot etgach besh o‘g‘il va bir qizni tarbiyalab voyaga yetkazgan. Ayol Ikkinchi jahon urushida besh nafar o‘g‘lining baridan ayrilgan.

2019 yil 9 may – Xotira va qadrlash kunida prezident Shavkat Mirziyoyev Zulfiya Zokirova va uning frontdan qaytmagan besh o‘g‘li, sadoqatli kelinlari xotirasiga atab muhtasham haykal o‘rnatish hamda unga «Matonat madhiyasi» deb nom berish taklifini bildirgan edi.

2020 yil Toshkent shahridagi G‘alaba bog‘i markazida bu haykal ochildi, shuningdek Zulfiya Zokirovaga bag‘ishlab badiiy film yaratildi.