Uzbekistan Airways Qozog‘istondagi norozilik namoyishlari tufayli Aqtauga parvozlarni bekor qildi 

Aviakompaniya xabariga ko‘ra, Aqtau xalqaro aeroporti xalqaro parvozlarni qabul qilishni va amalga oshirishni yopgani munosabati bilan, 2022 yil 5 yanvar kuni amalga oshirilishi rejalashtirilgan HY-9725/9726 Urganch – Aqtau – Urganch yo‘nalishi bo‘yicha muntazam qatnovlari bekor qilindi.

Qayd etilishicha, ushbu yo‘nalish bo‘yicha parvozlarni amalga oshirish kunlari haqidagi qo‘shimcha ma’lumot keyinroq taqdim etiladi.
⠀
Yo‘lovchilar 5 yanvar kuniga Aqtauga bekor bo‘lgan parvozlar aviachiptalarining to‘liq qiymatini chipta sotib olingan joyda qaytarib olishlari yoki boshqa sanaga bepul qayta bronlash huquqiga ega ekani eslatilgan.

Avvalroq, Qozog‘iston prezidenti Qosim-Jomart To‘qayev Mang‘istau viloyati va Olmaotada favqulodda holat joriy qilgani ma’lum bo‘lgan edi. Favqulodda holat mahalliy vaqt bilan 5 yanvar soat 01:30 dan 19 yanvarga qadar amal qiladi. 

Qozog‘iston g‘arbida avtogaz narxining oshishi munosabati bilan norozilik namoyishlari boshlandi, namoyishlar narxlarni pasaytirish va’dasidan keyin mamlakatning boshqa hududlarini ham qamrab oldi. 1 yanvar kuni gaz narxi 60 tengedan 120 tengega ko‘tarildi. Ikki kunlik mitinglardan so‘ng Mang‘istau viloyatidagi yonilg‘i quyish shoxobchalari egalari narxni 80-90 tengega tushirdi, biroq namoyishchilar buni yetarli emas deb hisoblamoqda.