2021 yilda xalq ta’limi tizimida kamida 27 mlrd so‘m o‘g‘irlangani ma’lum qilindi

Bugun, 25 fevral kuni Xalq ta’limi vazirligi mutasaddilari ishtirokida o‘tkazilgan matbuot anjumanida vazir o‘rinbosari Temur Komilov umumta’lim tizimida 2021 yilda yo‘l qo‘yilgan moliyaviy xato va kamchiliklar haqida ma’lumot berdi.

“Vazirlikning ichki audit xizmati tomonidan 2021 yil davomida ta’lim muassasalarida 91,1 mlrd so‘mlik moliyaviy xato-kamchiliklar aniqlandi. Shundan 27,1 mlrd so‘mi – jami moliyaviy xato va kamchiliklarning 30 foizi o‘zlashtirilgani, ya’ni o‘g‘irlangani aniqlandi”, dedi XTV rasmiysi.

O‘rganishlar natijasida 161 ta holatda jami 76 mlrd so‘mlik jinoyat alomatlari borligi uchun o‘rganish materiallari huquqiy baho berish va qonuniy choralar ko‘rish maqsadida huquq-tartibot organlariga taqdim etilgan.

“Misol uchun, Hisob palatasi boshchiligida o‘tgan yili Andijon viloyati Andijon shahrida o‘tkazilgan tekshirishda, xodimlarning daromad solig‘ini Davlat budjetiga o‘tkazmasdan, tizimda ishlamaydigan begona shaxslarning plastik kartalariga o‘tkazish orqali 11,5 mlrd so‘m mablag‘ o‘zlashtirilgani aniqlandi”, deb ma’lumot berdi Temur Komilov.