Namanganda Cobalt traktor tirkamasiga borib urilishi oqibatida ikki kishi halok bo‘ldi

1 oktyabr kuni kechqurun «Toshkent-O‘sh» avtomobil yo‘lining 293-kilometrida Cobalt mashinasi traktorga urilishi oqibatida 2 kishi vafot etdi. Namangan YHXB matbuot xizmati xabar berishicha, Toshkent—vodiy yo‘nalishida ketayotgan Cobalt haydovchisi harakat xavfsizligini ta’minlay olmay, o‘zidan oldindagi traktorga borib urilgan.

Oqibatda Cobalt’da bo‘lgan ikki nafar yo‘lovchi og‘ir tan jarohati olib voqea joyida vafot etgan. Haydovchi va ikki yo‘lovchi tan jarohati olib shifoxonaga yotqizilgan.

Qayd etilishicha, holat bo‘yicha Pop tumani IIB TB tomonidan tergovga qadar surishtiruv harakatlari olib borilmoqda.

Ayni vaqtda Namangan viloyati miqyosida YHXB mas’ullari tomonidan traktor haydovchilari o‘rtasida tushuntirish ishlari olib borilib, tungi vaqtda yoritish chiroqlari va nur qaytargichlar soz holda harakatlanish bo‘yicha qat’iy nazorat qilinmoqda.