Putin Ukraina urushidan oldin Bayden bilan sovg‘a almashgani ma’lum bo‘ldi 

Rossiya prezidenti Vladimir Putin 2021 yilda Jyenevada bo‘lib o‘tgan birinchi prezidentlik sammitida AQSh prezidenti Jo Baydenga 12 ming dollarlik ruchka va kanselyariya to‘plamini sovg‘a qilgan.  

Bloomberg nashrining yozishicha, sovg‘a almashinuvi 2021 yil iyun oyida bo‘lib o‘tgan 2,5 soatlik Jyeneva sammitida yuz bergan. Bu hozirda AQSh-Rossiya munosabatlaridagi so‘nggi qisqa muddatli «iliq davr» sifatida baholanmoqda. Ukraina bosqini boshlangach, munosabatlar keskin yomonlashdi. 

Nashrning qayd etishicha, kanselyariya to‘plami o‘sha yili Baydenga berilgan eng qimmatbaho sovg‘a bo‘lgan.  

AQSh prezidenti bunga javoban Putinga o‘zining sevimli qora «aviator» ko‘zoynaklaridan bir juftini va bizonning shisha haykalchasini sovg‘a qilgan. Bu haqda Oq uy xabar bergan edi. Biroq, Putinning sovg‘asi haqidagi ma’lumotni Oq uy ham, Kreml ham oshkor qilmadi. 

Baydenning Putinga sovg‘asi qiymati xabarda keltirilmadi.  

Ukraina prezidenti Vladimir Zelenskiy 2021 yilda Baydenga 700 dollarlik AQSh bayrog‘ini sovg‘a qilgan. 

Qo‘shma Shtatlarda davlat rahbari va yuqori lavozimli boshqa shaxslar tomonidan olingan sovg‘alar hisoboti an’anaviy tarzda e’lon qilib boriladi. Qimmatbaho sovg‘alarning aksariyati odatda AQSh Milliy arxiv va hujjatlar boshqarmasiga (NARA, National Archives and Records Administration) topshiriladi. Ammo istisnolar ham bo‘ladi. Mulozimlar sovg‘a qiymatini o‘z hisobidan davlatga to‘lab, uni o‘zida qoldirish huquqiga ham ega.