Bayden Germaniya bosimi ostida Kiyevga Abrams tanklarini yetkazib berishga qaror qildi

AQSh prezidenti Jo Bayden faqat Germaniya bosimi tufayli Ukrainaga Abrams asosiy jangovar tanklarini berishga rozi bo‘ldi, deb ma’lum qildi Oq uy. «Dastlab u ularni yubormaslikka qaror qildi, chunki uning harbiylari bu janglarda jang maydonida kerak emasligini aytdi», dedi Baydenning milliy xavfsizlik bo‘yicha maslahatchisi Jyeyk Sallivan 26 fevral, yakshanba kuni ABC telekanalida.

Shu bilan birga, Amerika armiyasi vakillarining so‘zlariga ko‘ra, Ukrainaga Germaniyaning Leopard tanklari kerak. Biroq, Sallivanning so‘zlariga ko‘ra, Germaniya rahbariyati Baydenga, agar AQSh Abrams'ni yetkazib bermasa, o‘z tanklarini Kiyevga topshirishga tayyor emasliklarini aytgan. Shu sababli, «ittifoqning birligi» va «Ukraina o‘zi xohlagan narsaga erishishi» manfaatlarini ko‘zlab, Bayden uzoq muddatda Abrams tanklarini berishga rozi bo‘ldi, garchi ular hozirda Ukraina armiyasiga kerak bo‘lmasa ham, deya qo‘shimcha qildi Amerika prezidentining maslahatchisi.

«Bu Leopard tanklari hozir jo‘natilmoqda va bu Jo Bayden qanday qilib Ukraina kerakli narsani olishi uchun o‘z atrofida global ittifoqni birlashtirganiga misoldir», dedi Sallivan Amerika tanklarini bu yil oxirigacha yetkazib berish ehtimoli haqidagi savolga javob berarkan.