Prezident saylovini o‘tkazish uchun 174 mlrd so‘m ajratildi

O‘zbekiston Markaziy saylov komissiyasi juma kuni bo‘lib o‘tgan yig‘ilishda 9 iyulga belgilangan muddatidan oldingi prezident sayloviga tayyorgarlik ko‘rish va uni o‘tkazish bilan bog‘liq xarajatlar smetasini tasdiqladi. 

Yig‘ilishda smetani tasdiqlashda budjet mablag‘larini tejashga e’tibor qaratilayotgani alohida ta’kidlandi. Umumiy xarajatlar 174,13 milliard so‘mga baholanmoqda, bu yig‘ilishda ta’kidlanganidek, 2021 yilda bo‘lib o‘tgan prezident saylovini o‘tkazish uchun ajratilgan mablag‘dan 41 foizga kam (o‘sha paytda 300 milliard so‘m ajratilgan edi). 

Partiyalarning umumiy tadbirlarini o‘tkazish va partiyalar tomonidan ko‘rsatilgan nomzodlarning saylovoldi tashviqotini o‘tkazish uchun ajratiladigan mablag‘lar miqdori 19,655 milliard so‘m yoki to‘rt nafar nomzodning har biri uchun (ro‘yxatga olingan beshta partiyadan ikkitasi bitta umumiy nomzod ko‘rsatyapti) 4,914 milliard so‘m miqdorida tasdiqlandi. 2021 yilda ushbu maqsadlar uchun 15,4 milliard so‘m yoki besh nomzodning har biriga 3,097 milliard so‘m ajratilgan. 

Hisob-kitoblarga ko‘ra, xarajatlarning qariyb 82 foizi okrug va uchastka saylov komissiyalari faoliyatini tashkil etishga sarflanadi. Ushbu mablag‘larning 76 foizi okrug va uchastka saylov komissiyalari a’zolariga kompensatsiya to‘lovlari bo‘lishi kerak, ularning asosiy qismini o‘qituvchilar, shifokorlar va faol fuqarolar tashkil etadi, deya ta’kidladi MSK.