OAV: «Vagner» XHK «harbiy politsiya» uchun xodimlar yollayapti

22 iyun, payshanba kuni «Vkontakte» ijtimoiy tarmog‘idagi «Vagner» XHK sahifasida «operativ ishlar va hibsga olishda tajribaga ega, komendantlik funksiyalarini bajarishga qodir» sobiq politsiya maxsus bo‘linmalari xodimlarini ishga olish to‘g‘risida e’lon paydo bo‘ldi. «Verstka» nashri bunga e’tibor qaratdi.

Jurnalistlar e’londa ko‘rsatilgan telefon raqamlaridan biriga qo‘ng‘iroq qildi. O‘zini Denis deb tanishtirgan XHK ishga yollovchisi ularga yollanma askarlar uchun bunday bo‘sh ish o‘rinlari birinchi marta paydo bo‘lganini aytdi. «Biz tezkor xodimlardan komendant polkni shakllantirmoqchimiz. Uni harbiy politsiya deb ataymiz», dedi u. Xizmat Ukrainaning egallab olingan hududlarida amalga oshiriladi. 

Ishga yollovchi bo‘lajak «ish»ning mohiyatini ham tushuntirib berdi. «Siz hamma kompaniya qoidalariga rioya qilishiga ishonch hosil qilishingiz kerak bo‘ladi. O‘g‘rilar va talonchilar yo‘qligiga, hech qanday kaltaklash, mastlik va hokazolarga. Shuningdek, [vazifalar] diversiya-razvedka guruhlarini aniqlash bo‘yicha tezkor topshiriqni o‘z ichiga oladi. Albatta, diversiya-razvedka guruhlari bilan ishlash ham kiradi: so‘roqlar, tezkor tergov, tezkor ish», dedi u. Shu bilan birga, yangi «harbiy politsiya» xodimlari «Vagner» XHK qoidalari Rossiya Mudofaa vazirligining boshqa «ko‘ngillilari» va harbiy xizmatchilari tomonidan buzilmasligini ta’minlashi kerak. Ishga qabul qiluvchining so‘zlariga ko‘ra, ular «vakolatlarga ega». «Mudofaa vazirligi xodimini qo‘lga olish mumkin. U yerda mast-alast mudofaachilar ko‘payib ketgan», - deydi u. 

«Harbiy politsiya» xodimining maoshi, va’dalarga ko‘ra, oyiga 240 ming rubl va «juda yaxshi» bonuslardan iborat bo‘ladi. Qaysidir bir aniq egallab olingan hududda xizmat qilishni tanlash mumkin emas. «Siz pionerlar lagerida emassiz, qayerga yuborishsa - o‘sha yerda ishlaysiz», dedi «Vagner» XHK ishga yollovchisi. 

2023 yil aprelida Yevropa Ittifoqi «Vagner» XHKga qarshi «Ukrainaning hududiy yaxlitligi, suvereniteti va mustaqilligiga tahdid soluvchi yoki buzg‘unchi harakatlar» uchun sanksiyalar kiritdi, deyiladi YeI rasmiy jurnalida. Ushbu xususiy harbiy kompaniyaning Yevropa Ittifoqi hududidagi aktivlari muzlatib qo‘yilgan, shuningdek, Yevropa Ittifoqi ushbu tashkilotga mablag‘ va iqtisodiy resurslar taqdim etishni taqiqlagan.