O‘zbekiston va Ozarboyjon o‘zaro tovar ayirboshlash hajmini 1 mlrd dollarga yetkazmoqchi 

Investitsiyalar, sanoat va savdo vazirligi ma’lumotiga ko‘ra, muloqotda ikki davlatning asosiy vazirliklari, idoralari, tarmoq birlashmalari, tijorat banklari va ta’lim muassasalari, shuningdek, diplomatik vakolatxonalari rahbarlari ishtirok etdi.

Qayd etilishicha, 2022 yilda mamlakatlar o‘rtasidagi tovar ayirboshlash hajmi 1,5 barobar, joriy yil boshidan buyon esa bu ko‘rsatkich 16 foizga oshdi. Ozarboyjonga to‘qimachilik mahsulotlari yetkazib berish hajmi 2,6 barobar, mexanik uskunalar yetkazib berish 19,7 foiz, shisha va shisha buyumlar yetkazib berish 76 foizga oshdi. Yaqin yillarda o‘zaro tovar ayirboshlash hajmini 1 milliard dollarga yetkazish uchun ikki mamlakat iqtisodiyotlari yetarli salohiyatga ega ekani alohida ta’kidlandi.

Uchrashuvda energetika va transport sohalarida hamkorlikni kengaytirish, hududlararo, madaniy-humanitar aloqalarni rivojlantirish masalalari ham ko‘rib chiqildi.

Tadbir yakunlari bo‘yicha O‘zbekiston va Ozarboyjon o‘rtasidagi hamkorlik bo‘yicha hukumatlararo qo‘shma komissiyaning 12-yig‘ilishi bayonnomasi hamda erishilgan kelishuvlarni mustahkamlovchi boshqa bir qator hujjatlar imzolandi.