Toshkent shahri IIBB firibgarlikning yangi turidan ogohlantirdi

Toshkent shahri Ichki ishlar bosh boshqarmasi telefon qo‘ng‘irog‘i orqali asosan qariyalarga nisbatan qilinayotgan firibgarlikning yangi turi paydo bo‘lganidan ogohlantirdi.

Bunda noma’lum shaxs qo‘ng‘iroq qilib, baqirib yig‘lagan ovozda «ona (yoki ota) men «avariya»ga uchradim, bu mening aybim bilan sodir bo‘ldi. Jabrlanuvchi og‘ir ahvolda, uni zudlik bilan operatsiya qilish kerak, meni qamab qo‘yishmoqchi», degan mazmunda gapiradi. So‘ng boshqa shaxs o‘zini tergovchi deb tanishtirib, yaqin qarindoshi, qizi yoki nabirasi avariya sababchisi bo‘lganini, hozir jinoyat ishi qo‘g‘atish va qamoqqa olish choralari ko‘rilayotganini aytib qo‘rqitadi. So‘ngra, jinoyat ishini qo‘zg‘atmaslik maqsadida go‘yo yo‘l transport hodisasi jabrlanuvchisi bilan kelishish uchun pul berish kerakligini aytadi. So‘ng jinoiy guruh a’zolaridan biri jabrlanuvchining uyiga yuboriladi. 

Kuryyer yetib kelib, pullarni olib ketadi. U yuzini ko‘rsatmaslik uchun tibbiy niqob, ochki yoki parik taqqan bo‘ladi. Kuryyer pullarni olib ketganidan so‘ng ham telefonda gaplashayotgan jinoyatchilar vaqt cho‘zadi va bu orada voqea joyidan qochib qolishga harakat qiladi. 

Qayd qilinishicha, bunday jinoiy guruh a’zolarining bir nechtasi ushlangan. Ularning bir nafari Qozog‘iston, ikki nafari Qirg‘iziston fuqarosidir. Holat bo‘yicha Jinoyat kodeksining 168-modasi (Firibgarlik) va 165-moddasi (Tovlamachilik) bilan jinoyat ishi qo‘zg‘atgan. 

Toshkent shahri IIBB shunday qo‘ng‘iroq bo‘lganda, darhol telefonni o‘chirib, farzand bilan shaxsan bog‘lanib, holatni tekshirishni so‘ramoqda.