Xersonda g‘arb yordamini kutayotgan dengiz piyodalari va Belgorodda zarbaga uchragan avtobuslar. Urush suratlari

Ukrainada urushning 803-kuni o‘tdi. Asosiy ma’lumotlar:

Rossiya mudofaa vazirligi G‘arbning «provokatsion bayonotlari va tahdidlari»ga javoban taktik yadro quroli bilan mashg‘ulot o‘tkazilishini ma’lum qildi.
RF TIVga Buyuk Britaniya elchisi chaqirildi — Devid Kemeronning Ukraina Rossiyaga britan qurollari bilan hujum qilishga haqli ekani to‘g‘risidagi so‘zlari uchun.
Belgorod oblastida dronlar avtobus va avtomobillarga hujum qilishi oqibatida yetti kishi halok bo‘lib, 35 kishi yaralandi.
Rossiyada neft va gaz sohasi armiya va qurol ishlab chiqarish zavodlari bilan raqobat tufayli ishchi kuchi taqchilligiga uchramoqda.
Demokratlarning Vakillar palatasidagi yetakchisi Ukraina mag‘lub bo‘lgan taqdirda, AQSh urushga aralashishga majbur bo‘lishi haqida gapirdi.
RF qo‘shini Sumi oblastiga aviazarba yo‘llab, dronlar bilan hujum qildi. Energetika infratuzilmasi shikastlangan, regionning bir qismi elektrsiz qolgan.

Ukraina qurolli kuchlarining Xerson oblastidagi artilleriyachilari

Xerson oblastida Ukraina qurolli kuchlarining boshqa bo‘linmalari qatorida 37-dengiz piyodalari alohida brigadasi ham harbiy xizmatni o‘tamoqda. Brigada 2023 yil boshida, Ukraina yangi qarshi hujumga tayyorgarlik ko‘rayotganida shakllantirilgan.

2S1 «Gvozdika» o‘ziyurar artilleriya qurilmalaridan 37-dengiz piyodalari alohida brigadasi ixtiyoriga ham berilgan. Mart oyida Bolgariya omborxonalaridagi «Gvozdika»larni ukrain harbiylariga yuborishi xabar qilingandi.
Kostiantyn Liberov / Libkos / Getty Images

«Fokus» nashri 2023 yil mayida 37-brigada Amerikaning Oshkosh M-ATV zirhli avtomobillari hamda fransuzlarning AMX-10RC rusumli «g‘ildirakli tanklari»ni qabul qilib olgani haqida xabar bergandi
Kostiantyn Liberov / Libkos / Getty Images

Ukraina hukumati bir necha bor g‘arblik ittifoqchilarni qurollar va o‘q-dorilarni yetkazib berishni tezlashtirishga chaqirgandi, yordam kelishi AQSh kongressi yarim yil mobaynida harbiy yordamni moliyalashtirish bo‘yicha kelisha olmagani tufayli ham sekinlashgandi. Aprel oyiga kelib Ukrainaga 61 milliard dollarlik yordam ajratish to‘g‘risidagi qonun loyihasi baribir ma’qullandi
Kostiantyn Liberov / Libkos / Getty Images

Rossiya davlat nashrlari, jumladan TASS agentligi, 2024 yil fevralida 37-brigada Krinki yaqinidagi janglarda qatnashgani haqida va go‘yoki og‘ir yo‘qotishlarga uchragani haqida xabar bergandi — bu Ukraina qurolli kuchlarining Dniproning chap sohilidagi muhim platsdarmi sanaladi. O‘shanda RF mudofaa vaziri Sergey Shoygu Krinki «tozalangani» haqida e’lon qilgandi, ammo Ukraina tomoni bunday bayonotlarni manipulyatsiya va faktlarni soxtalashtirish deb atagan.
Vlada Liberova / Libkos / Getty Images

Donetsk oblastidagi qabristonni minalardan tozalayotgan ukrain sapyorlari

Ukrainalik sapyorlar bu urushdagi eng shiddatli harbiy to‘qnashuvlar davom etayotgan Donetsk oblastidagi aholi yashash manzillaridan biridagi qabriston hududidan minalarni olib tashlamoqda. Mutaxassislarning baholariga ko‘ra, Ukraina hududini minalardan va janglardan keyin portlamay qolgan snaryadlardan tozalash uchun o‘nlab yillar talab etiladi.

Konstantinovka o‘qqa tutilishi oqibatlari

Rossiyaning Ukrainaga qarshi keng ko‘lamli urushiga qadar Donetsk oblastining Konstantinovka shahrida 70 ming atrofida odam yashagan. Hozirda bu yerda qancha odam qolgani bo‘yicha aniq ma’lumotlar yo‘q. Shahar muntazam ravishda zarbalar ostida turibdi. Rossiy qo‘shini Avdiyivka va Baxmut yo‘nalishlaridagi guruhlarini birlashtirib, Konstantinovkaga sharq va janubdan hujum qilishni rejalashtirmoqda.

Diego Herrera Carcedo / Anadolu / ddp / Vida Press

Belgorod oblastida dronlar hujumi

Belgorod oblasti rasmiylari deyarli har kuni ukrainlarning pilotsiz uchish qurilmalari hujumlari haqida xabar beradi, RF mudofaa vazirligi hisobotida esa region uzra dronlar urib tushirilgani haqida ma’lum qilinadi. Oblast gubernatori Vyacheslav Gladkovning so‘zlariga ko‘ra, 6 may kuni Ukraina dronlari Borisov rayonida qishloq xo‘jaligi korxonasi xodimlarini olib ketayotgan ikki avtobusga hamda bitta yengil avtomobilga zarba bergan. Yetti kishi halok bo‘lib, 35 kishi yaralangan.