Toshkentda jamoat tartibini buzgan fuqarolar IIO xodimlariga qarshilik ko‘rsatdi

Joriy yilning 10 may kuni taxminan soat 16:30 larda Chilonzor tumani, 5-mavze hududida 1980 yilda tug‘ilgan A.A. va 1984 yilda tug‘ilgan A.A. mast holatda bo‘la turib, jamiyatda yurish-turish qoidalarini qasddan mensimasdan, jamoat joyida bo‘la turib bir nechta fuqarolar (1993 yilda tug‘ilgan Sh.D., 1996 yilda tug‘ilgan A.S., 2002 yilda tug‘ilgan S.S.) bilan o‘zaro janjallashgan. 

Natijada, 2002 yilda tug‘ilgan fuqaro yengil darajadagi jarohatlar bilan tibbiyot muassasasiga murojaat qilgan.

Hodisa joyiga zudlik bilan milliy gvardiya va ichki ishlar xodimlari yetib kelishgan. Biroq, jamoat tartibini buzayotgan ikki nafar fuqarolar IIO xodimlarining qonuniy talablarini bajarmay, ularga faol qarshilik ko‘rsatishgan.

Mazkur holat yuzasidan Chilonzor tumani IIO FMB tomonidan tergovga qadar tekshiruv o‘tkazilmoqda, tekshiruv yakuni bo‘yicha qonuniy qaror qabul qilinishi ta’minlanishi aytilgan.