London - ittifoqchilarga: Kiyevga Qrimdagi nishonlarga zarba yo‘llashga ruxsat bering

Britaniya mudofaa vaziri Grant Shepps Germaniya va Ukrainaning boshqa ittifoqchilarini Kiyevga Qrimdagi nishonlarga G‘arb tomonidan yetkazib berilgan qurollar bilan zarba yo‘llashga ruxsat berishga chaqirdi. Britaniya Mudofaa vazirligi rahbari 19 may, yakshanba kuni Sky News telekanalida tegishli taklif bilan chiqdi. 

Sunday Morning with Trevor Phillips dasturining mehmoni qurolga ruxsatnomalar haqida batafsil ma’lumot bermadi. «Ammo men shuni aytishim mumkin: Ukraina omon qolish uchun kurashmoqda», - deya ta’kidladi Shepps. 

London quroli Qrimdagi harbiy nishonlarga zarba berish uchun ishlatiladi 

Bundan tashqari, vazir London Ukrainaga yetkazib berilgan qurollardan Rossiyadagi nishonlarni o‘qqa tutish uchun foydalanishga ruxsat beradimi, degan savolga javob berishdan bosh tortdi. Biroq, bu qurollar Qrimdagi harbiy nishonlarni yo‘q qilish uchun qo‘llanadi, dedi u. «Birlashgan Qirollik bizning qurollarimizdan qanday foydalanilishi haqida juda aniq pozitsiyaga ega. Biz Qrimni Ukrainaning ajralmas qismi sifatida ko‘ramiz», - deya qo‘shimcha qildi Shepps. 

London Ukraina tomoniga, xususan, Storm Shadow uzoq masofali qanotli raketalarni topshirdi. Kiyevning boshqa ittifoqchilari ham uzoq masofaga uchuvchi qurollarga ega, ammo ular Qrimda ulardan foydalanishga ruxsat bermayapti, dedi Britaniya Mudofaa vazirligi rahbari. 

London Moskva va Pekin o‘rtasidagi yaqinlashuvdan xavotirda 

Shu bilan birga, Shepps Rossiya va Xitoy o‘rtasidagi munosabatlar mustahkamlanishidan xavotir bildirdi. «Yodda tuting: bular demokratiyaga ishonmaydigan ikki davlat», - dedi vazir. «Agar ular o‘z tizimini butun dunyoga tarqatmoqchi bo‘lsa, biz ko‘zimizni katta ochib, bu bizning hayot tarzimizga to‘g‘ridan to‘g‘ri tahdid ekanini ko‘rishimiz kerak», deb qo‘shimcha qildi u.