Olaf Shols NATO bo‘yicha ittifoqchilarni Ukrainani qo‘llab-quvvatlashga chaqirdi

Germaniya kansleri Olaf Shols 19 dekabr, payshanba kuni Bryusselda bo‘lib o‘tgan Yevropa yetakchilarining uchrashuvida yana bir bor NATO bo‘yicha hamkorlarni Ukrainaga uzoq muddatli yordam ko‘rsatishga chaqirdi. «Ayon bo‘lishi kerakki, biz zarur bo‘lganda yordam berishga tayyormiz», dedi uning so‘zlaridan iqtibos keltirgan dpa agentligi.

Shuningdek, Shols Germaniya ittifoqchilaridan Kiyevni havo hujumidan mudofaa tizimlari, artilleriya va o‘q-dorilar bilan ta’minlash imkoniyatlarini ko‘rib chiqishni so‘ragan va Berlin «Ukrainaning Yevropadagi eng katta yordamchisi bo‘lishda davom etishiga» va’da bergan. Bundan tashqari, siyosatchi Yevropa davlatlari va AQSh o‘rtasidagi hamkorlik Donald Tramp Oq uyga kelganidan keyin ham davom etishiga ishonch bildirdi.

YeI yetakchilari: Ukrainani chetga surib qo‘ygan holda muzokaralar bo‘lishi mumkin emas

Urushning tugashi mumkinligi haqida gapirgan Shols, Ukraina ishtirokisiz hech qanday qaror qabul qilinmasligini yana bir bor ta’kidladi. Biroq, uning so‘zlariga ko‘ra, NATO Rossiya bilan to‘g‘ridan to‘g‘ri qarama-qarshilikka tortilmasligi muhim.

Sholsning fikri boshqa Yevropa yetakchilari tomonidan takrorlandi. Shu tariqa, Lyuksemburg bosh vaziri Lyuk Friden Yevropa «Ukraina tomonida turishi va har bir qadamni Ukraina bilan birgalikda va Yevropa Ittifoqi ishtirokida tashlashi kerak» dedi. «Ukrainaning kelajagi boshqa joyda emas, balki Yevropada hal qilinmoqda», — deya qo‘shimcha qildi u.

Niderlandiya bosh vaziri Dik Sxofning aytishicha, Ukraina «muzokaralar qanday sharoitda bo‘lishini belgilovchi» davlat bo‘lishi kerak. «Ayni paytda Ukraina bunga tayyorligini (muzokaralarga o‘tishni) aniq aytmadi», dedi siyosatchi.

NATO AQShni Ukrainaga harbiy yordam koordinatori rolida almashtirdi

Shimoliy Atlantika alyansi AQSh o‘rniga G‘arbning Ukrainaga harbiy yordam ko‘rsatishini muvofiqlashtirishni o‘z zimmasiga oldi. Bu haqda 17 dekabr kuni manbalarga tayanib, Reuters agentligi xabar berdi. Ularga ko‘ra, NATO shu yo‘l bilan AQShning saylangan prezidenti Donald Tramp Oq uyga qaytganidan keyin Kiyevni qo‘llab-quvvatlash mexanizmini himoya qilmoqchi.

Ilgari Kiyevga harbiy yordamni Vashington boshchiligidagi Ramshtayn guruhi muvofiqlashtirgan, u Germaniyadagi xuddi shu nomdagi AQSh havo kuchlari bazasida yig‘ilgan. Endi, Reuters ma’lumotlariga ko‘ra, Germaniyaning Visbaden shahridagi Amerika harbiy bazasida joylashgan NATOning Ukraina uchun xavfsizlik va ta’lim (NSATU) alyansining yangi missiyasi allaqachon buni amalga oshirishga kirishgan.

Agentlikning ta’kidlashicha, vakolatlarning NATOga o‘tkazilishi cheklangan samara berishi mumkin, chunki Tramp prezidentlikka kelganida Amerikaning Ukrainaga ko‘rsatayotgan yordamini kamaytirishi ehtimoli bor. Shu paytgacha Qo‘shma Shtatlar ushbu ko‘rsatkich bo‘yicha dunyoda yetakchilik qilgan: Kildagi Jahon iqtisodiyoti instituti (ifw) hisob-kitoblariga ko‘ra, 2022 yil yanvaridan 2024 yil yanvarigacha Vashington Kiyevga 42,2 milliard yevro ajratgan. Yordam hajmi bo‘yicha Germaniya 17,1 milliard bilan ikkinchi o‘rinda edi.