Trampning Ukraina va Rossiya bo‘yicha maxsus vakili Kiyevga tashrifini keyinga qoldirdi

AQShning yangi saylangan prezidenti Donald Tramp ma’muriyatining Ukraina va Rossiya bo‘yicha maxsus vakili, iste’fodagi general Kit Kellog Kiyevga avvaldan rejalashtirilgan faktlarni o‘rganish uchun safarini qoldirdi. Bu haqda 6 yanvar, dushanba kuni kechki payt Reuters Tramp atrofidagi to‘rt manbaga tayanib xabar berdi.

Qayd etilishicha, Kellogning nafaqat Kiyevga, balki Rim va Parijga ham tashrifi saylangan prezidentning «inauguratsiyasidan keyingacha» qoldirildi. Agentlik manbalari Yevropaga safarning keyinga qoldirilgani sabablarini aytmadi. «Kellog ham, Ukrainaning Vashingtondagi elchixonasi vakili ham izoh berish so‘rovlariga javob qaytarmadi», — deyiladi Reuters xabarida.

Kellog yanvarda Kiyevga tashrif buyurishni rejalashtirgandi

Avvalroq AQShning saylangan prezidenti Donald Tramp Ukraina va Rossiya Federatsiyasi bo‘yicha o‘zining maxsus vakili etib tanlagan iste’fodagi general Kit Kellog yanvar oyi boshida Yevropaning bir qancha poytaxtlariga, jumladan Kiyevga ham tashrif buyurishni rejalashtirayotgani aytilgandi. 

Kellog Kiyevda Ukraina rahbariyati bilan uchrashmoqchi ekani bildirilgan. Bundan tashqari, uning jamoasi Parij va Rimda yuqori martabali siyosatchilar bilan uchrashuvlar tayyorlagan. Maqsad Ukrainadagi urushni tugatish bo‘yicha unchalik faol muzokaralar emas, balki AQShning yangi ma’muriyati uchun ma’lumot to‘plash edi.

AQSh yangi prezidentining inauguratsiyasi 2025 yil 20 yanvarga belgilangan.