Trampning maslahatchisi Putin bilan uchrashuvga tayyorgarlik boshlanganini aytdi

AQSh saylangan prezidenti Donald Tramp va Rossiya yetakchisi Vladimir Putin o‘rtasidagi uchrashuvga hozirdan tayyorgarlik ko‘rilmoqda. Bu haqda Trampning milliy xavfsizlik bo‘yicha maslahatchisi Maykl Uols ma’lum qildi, deb yozdi RBK.

«Tayyorgarlik ishlari allaqachon olib borilmoqda», dedi u Putin bilan uchrashuv vaqti va shakliga aniqlik kiritmagan holda.

Ukraina prezidenti Volodimir Zelenskiy ishtirokidagi uch tomonlama uchrashuv haqidagi savolga javoban u «buning uchun aniq asos» yo‘qligini aytdi. Uols shuningdek, Putin va Tramp o‘rtasida «yaqin kunlar yoki haftalarda» telefon orqali suhbat o‘tkazilishini istisno qilmadi. «Bu biz birinchi navbatda tashlaydigan qadam bo‘ladi, keyin esa harakatni boshlaymiz», dedi u.

«Prezident Tramp fikriga ko‘ra, agar siz boshqa tomon bilan qandaydir muloqot va munosabatlarga ega bo‘lmasangiz, kelishuvga erisha olmaysiz. Kelgusi oylarda bu borada albatta ishlaymiz», deb qo‘shimcha qildi u.

Tramp avvalroq Putin bilan muzokaralar o‘tkazishga, jumladan, Ukrainadagi urushni hal qilish masalasini muhokama etishga tayyorligini bir necha bor ta’kidlagan edi.

19 dekabr kuni Putin jonli efirda Tramp bilan uchrashishga tayyorligini aytdi. «Qachon uchrashishimizni bilmayman. Men u bilan to‘rt yildan ortiq gaplashmadim. Men bunga tayyorman, uchrashuvga ham tayyorman», dedi u.