Moskva markazida FSB aksilrazvedka xodimi otib ketildi

Moskva markazidagi Olxovaya ko‘chasida joylashgan Rossiya Mudofaa vazirligi binosida Rossiya Federal xavfsizlik xizmati (FSB) aksilrazvedka boshqarmasi xodimi Vladimir Feshchenko o‘lik holda topildi, deb xabar bermoqda TASS agentligi 14 yanvar, seshanba kuni. «Tekshiruv chog‘ida boshidan o‘q jarohati aniqlangan. Qotillikka harbiy xizmatchi bilan maishiy janjal sabab bo‘lgan», — dedi agentlik manbasi.

TASS manbasining aniqlik kiritishicha, jinoyatda gumonlanuvchi qo‘lga olingan. Qotillik moddasi bo‘yicha jinoiy ish ochilgan.

Tergov jarayonidan xabardor manbaning RBK agentligiga aytishicha, asosiy versiya qotillikdir. "O‘q ikki erkak o‘rtasidagi janjal natijasida otilgan bo‘lishi mumkin", dedi u.

Feshchenko - tosh ko‘tarish bo‘yicha Rossiya chempioni.

FSB rossiyalik harbiylarga qarshi teraktlar oldi olinganini xabar qilgan

26 dekabr kuni Federal xavfsizlik xizmati rossiyalik yuqori martabali harbiy xizmatchilar va ularning yaqinlariga qarshi Ukraina maxsus xizmatlari tomonidan tayyorlangani aytilgan qator teraktlarning oldi olingani haqida ma’lum qildi. FSB ushbu suiqasdlarni tayyorlashda ishtirok etgani aytilayotgan to‘rt nafar Rossiya fuqarosi hibsga olingani va ulardan «qo‘lbola portlovchi qurilmalar va aloqa vositalari» musodara qilingani haqida xabar berdi.

Hujumlar nishoniga aylanishi mumkin bo‘lgan yuqori martabali rossiyalik zobitlar Rossiyaning Ukrainadagi keng ko‘lamli urushida qatnashmoqda, deya aniqlik kiritdi FSB.

Moskvada general Kirillovning o‘ldirilishi

17 dekabr kuni Moskvada Rossiya Qurolli kuchlarining radiatsiyaviy, kimyoviy va biologik mudofaa qo‘shinlari boshlig‘i general-leytenant Igor Kirillov va uning ad’yutanti Ilya Polikarpov o‘ldirildi. Tergovchilarning taxminiga ko‘ra, portlovchi qurilma ular chiqib ketayotgan kirish eshigi yonida turgan samokatga o‘rnatilgan. The Wall Street Journal, Reuters va "Ukrinform" manbalarga tayanib, portlashda Ukraina maxsus xizmatlarining ishtiroki haqida yozgan. SBUdagi manbaning VVS'ga aytishicha, Kirillov «harbiy jinoyatchi» sifatida «maxsus operatsiya» natijasida yo‘q qilingan.

Shu bilan birga, Ukraina prezidenti devoni rahbari maslahatchisi Mixaylo Podolyak The Breakfast Show efirida Kiyev terrorchilik usullaridan foydalanmasligini va «u yoki bu generalga oid qarorlar jang maydonida qabul qilinishini» aytdi. 

Rossiya Tergov qo‘mitasi O‘zbekiston fuqarosi Ahmad Qurbonov Kirillovning o‘ldirilishida gumonlanuvchi sifatida qo‘lga olinganini ma’lum qildi. U terrorizmda ayblanmoqda.

13 yanvar kuni Ingushetiyaning ikki fuqarosi general Kirillovning o‘ldirilishiga aloqadorlikda ayblanib hibsga olingani ma’lum bo‘ldi. «Kommersant» xabariga ko‘ra, ism-shariflari oshkor etilmagan erkaklar Sibirda ushlangan. Ular hozirda politsiya xodimlariga bo‘ysunmaslik va mayda bezorilik moddalari bo‘yicha ma’muriy qamoqqa olingan, yanvar oyi oxirida esa tergov harakatlari uchun Moskvaga jo‘natilishi rejalashtirilgan.

FSB ma’lumotlariga ko‘ra, qo‘lga olinganlar Kirillov o‘ldirilishidan oldin jinoyat sodir etganlikda gumon qilinayotgan o‘zbekistonlik Ahmad Qurbonov uchun Moskva oblastida uy ijaraga olgan. Qotillikdan keyin ular Sibirga jo‘nab ketgan.