Янги iPhone фотосуратлари интернетда чоп этилди

Гўёки Apple’нинг ҳали анонс қилинмаган смартфони акс этган фотосурат One More Thing форумининг фойдаланувчилари томонидан чоп этилди. Компания манбаларига ишонадиган бўлсак, iPhone 5s’нинг такомиллаштирилган версияси бўлган ускуна март ойида расман тақдим этилади.

Янги аппарат суратга iPhone 5 билан ёнма-ён туширилган. Дизайнига кўра у кўпроқ iPhone 6ни эслатиб юборади – ёқиш тугмаси корпуснинг ўнг ёнида жойлашган, баландликни бошқариш тугмалари эса узайиб, ҳажман бироз қисқарган.

Мутахассисларнинг айтишича, фотосуратда дарҳақиқат iPhone 5se’нинг охирги версияси ёхуд прототипларидан бири кўрсатилган. Ўтган йиллар мобайнида шу манбанинг ўзи iPad Air 2 экрани ва iPad Air корпусининг ҳаққоний суратларини чоп этган эди.

Март ойида тақдим этилиши кутилаётган iPhone 5se iPhone 5s билан бир хил 4 дюймли экранга, iPhone 6никига уйғун процессор ва камерага, iPhone 6s’дан олинган коммуникацион чипларга эга бўлади. Ускуна, шунингдек, Apple Pay тўлов тизимини қўллаб-қувватлаш учун NFC чипи ҳамда Live Photos “тирилган фото” функцияси билан таъминланади. Шу билан бирга, iPhone 6s’да тақдим этилган босиш кучини ўлчайдиган сенсор ушбу гаджетда бўлмайди.

Ускуна линейкада iPhone 5s’нинг ўрнини эгаллайди ва унинг нархида сотилади.