Microsoft вице-президенти рақиб компаниянинг смартфони iPhone’дан фойдаланишда “қўлга тушиб қолди”

Microsoft вице-президенти Жо Бельфиоре рақиб компания Apple’нинг смартфони iPhone’дан фойдаланишда “қўлга тушиб қолди”. Бу хато кечириб бўлмайдиган хатодир, чунки Бельфиоре Microsoft’да 25 йилдан кўпроқ вақт қишлайди ва компаниянинг смартфонлари қатори учун Windows Phone операцион тизимини ишлаб чиқувчи бўлимга раҳбарлик қилади, деб хабар бермоқда Fox News телеканали.

Телеканал маълумотларига кўра, Бельфиоре Twitter ижтимоий тармоғида Япониянинг Киото шаҳридан юборилган фотосуратни жойлаштирган. Ушбу пост iPhone’дан юборилгани сабабли кўпчилик фойдаланувчиларнинг эътиборини тортди. Энди фойдаланувчилар Бельфиорега компанияга содиқлик кодексини бузгани учун қандай жазо кўрилишига қизиқмоқдалар.

Бельфиоре ўз айбини оқлаш учун унга иши давомида рақобатчи компаниялар маҳсулотларининг афзалликлари ва камчиликлари ҳақида хабардор бўлиши зарурлигини айтди. “Биз бутун жаҳон бўйлаб компьютерлар эгалари фойдаланаётган ва Windows Phone билан рақобат қилаётган iPhone каби смартфонлар ва Android каби маҳсулотларни билишимиз муҳимдир. Истеъмочилар ва тадбиркорлар ўзларининг компьютерлари ва смартфонлари биргаликда ишлашига умид қиладилар. Мижозларимизнинг эҳтиёжларини қаноатлантириш учун бу қурилмаларга мижозларимиз фойдаланишни истайдиган қурилмалар каби қарашимиз керак”, деб айтди Бельфиоре.

Бельфиоре Windows Phone’нинг кейинги авлодлари ишлаб чиқилиши учун жавоб беради. 2013 йилда у Business Insider нашри бўйича жаҳоннинг энг яхши технологик дизайнерларининг ўнталигига киритилганди.