Олий Мажлис делегацияси Германияга ташриф буюрди

24-25 октябрь кунлари Олий Мажлис Қонунчилик палатаси Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси бошчилигидаги парламент делегацияси амалий ташриф билан Германияда бўлди.

Ташриф доирасида Бундестаг, мамлакат парламентида кўп ўринга эга бўлган Германия социал-демократик партияси (ГСДП) ва Германия христиан-демократик иттифоқи (ГХДИ) депутатлари билан учрашувлар, Германия ҳукумати, парламенти, жамоат, эксперт-академик доиралар ҳамда оммавий ахборот воситалари вакиллари иштирокида “Ўзбекистон Республикаси Президенти сайловига тайёргарлик кўриш ҳамда уни ўтказишнинг демократик стандартлари” мавзусида давра суҳбати ташкил этилди.

Тадбирлар чоғида Германия томони Ўзбекистондаги ижтимоий-иқтисодий ва сиёсий-ҳуқуқий жараёнларнинг бориши, суд-ҳуқуқ соҳасида амалга оширилаётган ислоҳотлар, фуқаролик жамияти институтларини янада мустаҳкамлашга қаратилган чора-тадбирлар билан таништирилди.

Учрашувларда қатнашчиларга бўлажак Ўзбекистон Республикаси Президенти сайловига тайёргарлик кўриш ҳамда уни ўтказиш жараёнлари, ушбу муҳим сиёсий тадбирни халқаро стандартларга мувофиқ ўтказишнинг ҳуқуқий кафолатлари хусусида батафсил маълумот берилди. Таъкидланганидек, мустақиллик йилларида Ўзбекистон сайлов қонунчилигида жиддий сифат ўзгаришлари амалга оширилиши самарасида бугунги кунга келиб соҳа ҳуқуқий асоси энг юқори демократик талабларга жавоб беради.

ЕХҲТ Демократик институтлар ва инсон ҳуқуқлари бўйича бюроси биринчи марта Ўзбекистонга сайловни кузатиш бўйича тўлиқ таркибдаги миссияни юборишга қарор қилганига алоҳида эътибор қаратилди. Қолаверса, Ўзбекистон томони сайловни кузатиб бориш юзасидан МДҲ, ШҲТ, ИҲТ, Бутунжаҳон сайлов органлари ассоциацияси миссияларини, хорижий давлатлар, шу жумладан, Германиядан кузатувчиларни таклиф этди.

Ўзбекистон раҳбарияти томонидан жамиятни демократлаштириш, суд тизими мустақиллигини мустаҳкамлаш ва иқтисодиётни либераллаштириш бўйича амалга оширилаётган ишлар ҳақидаги маълумотлар Германия томонида катта қизиқиш уйғотди. Айниқса, Ўзбекистон Республикаси Бош вазирининг виртуал қабулхонаси фаолият бошлагани кўпчиликнинг диққатини тортди. Мазкур қадам, иштирокчиларнинг фикрича, аҳолининг манфаатлари ҳамда фаровонлиги Ўзбекистон ижро ҳокимияти учун биринчи галдаги вазифа эканидан далолат беради.

Давра суҳбати давомида германиялик маърузачилар Ўзбекистонда яратилган барқарор сиёсий тизим, такомиллаштирилган сайлов қонунчилиги ва кўп сонли маҳаллий ва халқаро кузатувчиларнинг иштироки бўлғуси сайловнинг тўласинча демократик принципларга мос равишда ўтказилишини таъминлайди.

Бундестаг Халқаро ҳамкорлик қўмитаси эксперти, доктор Анреас Яннинг таъкидлашича, Ўзбекистон бутун Марказий Осиёнинг тинчлиги ва барқарор тараққиётини таъминлашда муҳим роль ўйнайди. У қўшни давлатлар билан ҳамкорликни фаоллаштириш, демократик ислоҳотларни чуқурлаштириш, жамиятни модернизациялаш ва иқтисодиётни либераллаштиришга қаратилган ишларни юксак баҳолади.

Маценат фуқаролик жамиятини ўрганиш институти директори, доктор Экхард Приллер Ўзбекистондаги Президент ва парламент сайловларида кузатувчи сифатида иштирок этиб, мамлакатда сайлов жараёнларини босқичма-босқич такомиллаштирилаётгани гувоҳи бўлганини маълум қилди. Германиялик мутахассис бўлғуси сайлов ҳам Ўзбекистон миллий сайлов тизимида очиқлик ва демократик тамойиллар янада мустаҳкамланганини амалда намоён этишига ишонч билдирди.

Э.Приллер Ўзбекистоннинг нодавлат ташкилотларнинг вужудга келиши ва мустаҳкамланиши борасидаги ютуқларига ҳам эътибор қаратди. Унинг таъкидлашича, “кучли давлатдан кучли фуқаролик жамияти сари” тамойилини изчиллик билан ҳаётган татбиқ этаётган Ўзбекистон бу борада наинки ижобий хоридий тажрибани амалга жорий қилмоқда, балки бошқа давлатлар ўрганса арзийдиган ўзига хос жиҳатларини ҳам намоён этмоқда.

Бранденбург технолиялар ва инновацияларни қўллаб-қувватлаш институти президенти, профессор Э.Клозе Ўзбекистонда Президент сайловига тайёргарлик кўриш жараёнларини юқори баҳолади. Унинг билдиришича, бўлғуси сайловни кузатишда етакчи халқаро ташкилотлар миссиялари, хорижий давлатларнинг кўп сонли вакилларининг иштирок этиши Ўзбекистоннинг бутун дунёга очиқлигидан далолат беради.

Германиялик олим Ўзбекистон раҳбарияти томонидан тараққиётни янги босқичга кўтариш юзасидан амалга оширилаётган ишларга алоҳида тўхталди.

“Биз республикада сиёсий ва иқтисодий ислоҳотларни чуқурлаштириш бўйича кўрилаётган чора-тадбирларни катта қизиқиш ва ҳаяжон билан кузатмоқдамиз. Шу боис Ўзбекистонда аҳолини фаровонлигини ошириш, ижтимоий ҳаётнинг барча жабҳаларини барқарор ривожлантиришни таъминлашга қаратилган кенг миқёсли ислоҳотларнинг янги босқичи бошланмоқда, дея баралла айтишимиз мумкин”, дея таъкидлади Э.Клозе.

Тадбир иштирокчиларидан айримлари ўз фикрлари билан ўртоқлашди.

Бонн шаҳридаги Германия-Ўзбекистон жамияти вице-президенти Хайнц Бюлер:

“Ўзбекистонда амалга оширилаётган суд-ҳуқуқ ислоҳотларининг тадрижийлиги ҳамда самарадорлигини алоҳида таъкидлашни истардим. Ўзбекистоннинг янги раҳбарияти томонидан бугун эълон қилинган суд ҳуқуқ тизими мустақиллигини мустаҳкамлаш ва ҳуқуқ-тартибот тизимини инсонпарварлигини янада чуқурлаштириш бўйича маълумоти мамлакатингиз ўз демократик тараққиёт йўлидан оғишмай ҳаракат қилаётганининг ёрқин инъикосидир.

Аҳоли мурожаатлари бўйича Ўзбекистон Республикаси Бош вазири виртуал қабулхонасининг очилиши алоҳида ўринга эга. Бунда фуқаролар ҳукумат раҳбарига нафақат арз ва шикоятлари, балки ижтимоий ҳаётнинг у ёки бу жабҳасини яхшилаш бўйича аниқ таклифлари билан мурожаат этаётгани таҳсинга сазовор.

Бу ҳолат ҳокимиятнинг очиқлигидан, шунингдек, Ўзбекистон фуқароларининг жойлардаги муаммоларни ҳал этишда кенг иштирок этаётганидан далолат беради”.

Германия корпоратив фуқаролиги маркази ижрочи директори, доктор Сюзанне Ланг:

“Ўзбекистондаги сайловолди жараёнлари ҳамда жамиятни модернизация қилиш бўйича амалга оширилаётган чора-тадбирлар юзасидан тақдим этилган маълумотлар Ўзбекистон ҳукуматининг ижтимоий йўналтирилган бозор иқтисодиётига эга замонавий демократик давлатни барпо этиш йўлида собит бораётганини кўрсатмоқда.

Биз Ўзбекистонга бу йўналишда ва бошқа соҳаларда ҳар томонлама ёрдам беришга тайёрмиз. Ўзбек халқига давлатнинг янги раҳбари бошчилиги остида фаровонлик тилайман”.